ICH Haertneid der Chuelber hern Artolfs seligen des Chulbaer sun. vnd all mein Erben veriehen vnd tu^en chunt offenleich mit dem brief Allen den die in an sehent oder ho^ernt lesen. die nu lebent vnd her nach chu^enftig sind Daz ich mit wolbedahtem mu^et mit gu^etleihem willen vnd auch nach meiner naesten vnd pessten vreund rat zder zeit, da ich ez mit reht wol getu^en moht Reht vnd redleich verchauft han meins rehten vrein aigens daz ich gehabt han meinen hof datz Mairhofen gelegen in Hertzogenburger pharr vnd alles daz daz darczu^e geho^ert ze veld vnd ze dorffe, ez sei gestifft oder vngestifft, versuht oder vnuersuht wie daz alles genant sei, Ez sei purch reht, pawe, wismat, Gaerten, Paumgaerten, waid oder Holtze, wo daz gelegen ist Denselben Hof ze Mairhof mit aller seiner zu^egehorung als nu^e benant ist den han ich verchaufft vnd geben mit alle den Eren nu^etzen vnd rehten als ich vnd der vorgenant her Artolf der Chu^elber mein vater den in nutz vnd in gewer vnuersprochenleich inne gehabt vnd her pracht haben vmb zwai hundert phunt vnd fu^enf vnd newntzig phunt wienner phenning der wir gar vnd gaentzleich verricht vnd gewert sein. Dem erbirdigen vnd geistleihen herren hern Niclasen von Wiermla, Probst des Gotshawzz ze Hertzogenburg vnd dem Conuent gemainleich daselbs vnd allen iren nachko^emen fu^erbas ledichleich vnd vreileich ze haben vnd auch allen iren frumen da mit ze schaffen mit verchauffen mit versetzen vnd geben swem sev wellen an allen chrieg vnd irrsal. Auch pin ich vorgenanter Hertneid der Chu^eliber mit sampt meinen erben vnuerschaidenleich des ir reht Gewern vnd scherm fu^er alle ansprach, als aigens reht ist vnd des Landes reht in O^esterreich. Get aber in fu^erbas daran icht ab mit reht, oder ob sev mit reht icht chrieg oder ansprach dar an gewunnen von swem daz waer, daz schullen wir In alles ausrichten, ablegen vnd widercheren an alle ir mue vnd an allen irn schaden, vnd sullen si daz haben auf vns vnd auf alle dem Gu^et, daz wir haben in dem Lande ze O^esterreich, oder wo wir daz haben wir sein lembtig oder tod. Daz der Chauf fu^erbas staet vnd vnzebrochen beleib Daruber so gib ich Haertneid der Chu^eliber dem Egenanten Gotshaus ze Hertzogenburg den brief versigilten mit meim Insigil vnd mit meiner liben vrevnd Insigiln Jansen insigil von Ybs meins O^ehaims, Hainreichs des Leonperger insigil meins O^ehaims, Stephans des Meilawer insigil vnd Pernolts des Chlingenfurtaer insigil, die ich des vleizzichleich gepeten han daz sev der sach zewgen sind mit iren insigiln. Geben ze Hertzogenburg nach Christs gepu^erde drewczehen hundert iar, dar nach in dem sechs vnd sechczigisten iar an sand Maria Magdalen tag.

Source Fulltext: FAIGL, Herzogenburg (Wien 1886) S. 247-248