Nouerint vniuersi presentes literas inspecturi quod nos Otto Abbas Monasterii Vormbacensis sponte et matura deliberacione pro bono pacis et concordie et ut nostre Ecclesie dampna et pericula in antea vitaremus, arbitrium et arbitramentum et amicabilem compositionem honorabilium et circumspectorum virorum Magistri Nicolai Loher Decretorum Doctoris, domini nostri Patauiensis Episcopi Officialis, domini Nicolai Rectoris parochialis Ecclesie in Traysenmawer domini Stephani de Topel et Pittrolfi dicti Chlingenfurtaer super omnibus controversiis impeticionibus accionibus querelis quas cum venerabilibus patribus et dominis domino Nicolao preposito Monasterii in Hertzogenburga et domino Ottone preposito Monasterii ad Sanctum Andream et eorum conuentibus habuimus et habemus occasione certorum pascuorum arborum piscacionum aquarumque decursibus nostro et Ecclesie nostre nomine subivimus taliter in hunc modum, quod illi dicti arbitri seu arbitratores infra festivitates Pascatis et Pentecostes proxime venientes certa die a nobis et dictis dominis prepositis statuenda in nostro Hertzogenburgensi Oppido conueniant et omnia nostra iura et alia ad decisionem dicti litigii facientia audiant et videant et diligenter attendant ipsisque visis et auditis et cognitis arbitrando promulgando et amicabiliter componendo faciant statuant et diffiniant quidquid ipsis secundum deum et conscienciam ac secundum visa cognita et audita videbitur faciendum. Verum tamen si dicti quatuor arbitri sic recepti in aliquo discordarent, tunc consentimus et volumus et ex nunc sicut ex tunc ipsis damus liberam facultatem, ut quintum recipiant honorabilem fidedignum et in sacerdocio constitutum, qui eorum discordiam ad concordiam reuocabit. Volumus eciam quod predicta pascua arbores piscaciones aquarum ab ambabus partibus tam a nobis quam ab ipsis in eodem statu permaneant sicut hactenus permanserunt donec ad finalem huius litigii dicti decisionem (ventum fuerit?) promittentes nos ratum gratum et firmum perpetuis temporibus habituros quidquid per dictos arbitros et arbitratores et amicabiles compositores arbitratum promulgatum et statutum fuerit sub nostre fidei dacione. Si vero aliquis ex nobis in dicto termino occupatus fuerit legitimis impedimentis iste habere debet alium fide dignum cum sufficienti mandato ad dictum terminum loco sui ad omnia faciendum que ad dictam concordiam requiruntur. Si eciam aliquis ex dictis arbitratoribus siue arbitris nominatis interesse non posset casu quocunque, eidem erit a parte, que ipsum recepit, alius consimilis arbiter subrogandus, qui habebit et habere debebit potestatem omnimodam sicut primus. In quorum omnium testimonium et certitudinem pleniorem presentes damus literas a tergo nostri sigilli munimine communitas. Datum Hertzogenburge in Crastino Beati Nicolay anno domini M^mo CCC^rao LXVII^mo.

Source Fulltext: FAIGL, Herzogenburg (Wien 1886) S. 252-253