Wir Albrecht von Gots gnaden Hertzog ze O^esterreich ze Steyr ze Kernden vnd ze Chrayn. Graf ze Tyrol etc. Tu^on chunt. Vmb die Vischwaide auf der Traysem bey Oberndorff die vnser getrewer lieber Rudolf von Losenstain von vns ze Lehen hat gehabt, vnd die er nv verchauft hat dem erbern geistlichen vnserm lieben Chaplan Probst Niclasen von Hertzogenburch Daz wir die Aygenschaft derselben Vischwaide demselben Probst Niclasen von Hertzogenburg lauterlich durch Got gegeben haben vnd geben ouch also daz er furbaz damit allen seinen frumen schaffen sol vnd mag als mit andern seinen aygenn Gu^etern ane geuer vnd als im das aller pest chome vnd fu^ege ane alle irrvng. Wan da gegen der obgenant Ru^edolf von Losenstain seins aygenn Gu^ets an sechtzig phennig drev phvnt gelts auz seinem Hof ze Anger vnd ein halb phvnt Gelts auf v^eberlend ze fuchking die sein aygen waren ze Lehen von vns emphangen hat Vnd sol ouch er vnd sein Erben die fu^erbazz eweklich ze rechten Lehen von vns vnd vnserm liebn Bru^eder vnd vnsern Erben haben vnd bechennen nach Lehens vnd Landes recht, als der brief sagt den vns der vorgenant Losenstainer daruber geben hat. Mit vrchund ditz briefs. Geben ze Wyenn an Mittichen vor sant Merteins tag. Nach Christs gepurt Drevtzehen Hvndert Jar Dar nach in dem acht vnd Sechtzigisten Jare.

Source Fulltext: FAIGL, Herzogenburg (Wien 1886) S. 258