ICH Mert der Haedweiger von Gotzensdorf vnd ich Elzpet sein hausvraw vnd alle vnser Erben Wier veriehen offenbar mit dem brief vnd tun chunt allen den die in an sehent oder ho^erent lesen. Daz wir mit gu^eter varbetrachtung mit gunst vnd willen aller vnser Erben die zeit da wir ez mit recht wol tun machten Recht vnd redleich gestift vnd geben haben zehen schilling vnd acht phennig geltz wienner phennig die hab wir gestift auf vnser purchrecht vnd haben daz tan mit vnsers purchherren gunst vnd gu^eten willen hern Leben des Truchsaeczen von Gotzenstorf von dem die gu^eter purchrecht sind ain wis haizzet die Hachk da man im von dient zwen phennig ze purchrecht vnd ain weingart leit an dem fuerperig ze Goetzenstorf vnd haizzet die setz pey dem weg da man im von dient ain phennig vnd drey jeuchart acher der leit ain jeuchart pey dem Chreutz an dem wogram. vnd ain jeuchart leit an die hayd vnd ain jeuchart leit gen Reichenstorf pey dem marichstain. die Echer dient alle drey drey wienner phennig ze purchrecht vnd nicht mer. Daz Egenant purchrecht allez wis weingarten vnd Echer dient jaerleich auf sand Michels tag Also mit auzgenomener red daz man jaerleich an unser vrawn obent ze der Liechtmess von den vargenanten guetern schol geben acht vnd zehen schilling wienner phennig da schol man vierczehen phunt wachs vmb chauffen ze vierczehen chertzen in daz rad hintz sand Stephan gen Hertzogenburch in die pharr die schullen da prinnen alle hachczeit vnd an der czwelifpoten tag Got vnd vnser lieben vrawn vnd den heyligen czwelifpoten ze Lob vnd ze Ern vnd vnser sel ze trost. Ich vargenanter Mert der Haedweiger wil daz Egenant gu^et nutzen vnd inne haben vncz an meinen tod vnd wil auch die Liecht die czeit gaentzleich volpringen an allen abganch. Vnd nach meinem tod so schol iz der pharrer von Hertzogenburch wer pharrer da ist die obgenanten gu^eter wis weingarten vnd Echer nutzen vnd inne haben oder wem er sein gan der dem obgenanten dienst davon raich daz die Egenanten Liecht gar vnd gaentzleich volpracht werden als iz var an dem brief geschriben ist vnd daz auch die gu^eter nicht pawlaz werden. Waer aber daz. der pharrer daran icht saumig waer vnd daz die Liecht nicht volfu^ert wurden als iz var an dem brief geschriben ist so schol sich der purchherre wer der gu^eter die zeit purchherre ist der schol sich der gu^eter vnterwinten vnd schol die aynem inantwurten nach der nachpawren rat der den dienst raich vnd die Liecht gentzleich volpring an allen abganch. Daz der Stift vnd die Wandlung alle also stet vnd vntzerbrochen beleib dar uber hab wir gepetten den obgenanten vnsern purchherren hern Leben den Truchsaetzen daz er die wandlung vnd die stift bestet hat mit seinem aygen insigil. Dar czu hab wir auch petten den Erbern hern Pylgreim den flaeming von Gotzenstorf daz Er der sach auch zeug ist mit seinem insigil im an schaden wanne wir aygen insigil nicht enhaben vnd verpinden vns mit vnsern 'trewn vnter die Obgenanten insigil allez daz stet ze haben daz var an dem brief geschriben ist. Geben an sand Dorothe tag nach Christ gepurde drewczehen hundert iar dar nach in dem Newn vnd sechczkistem iar.

Source Fulltext: FAIGL, Herzogenburg (Wien 1886) S. 260-261