ICH Weykchart von Toppel ze Charlsteten vnd all mein Erben. Vergehen vnd tun chunt offenlich mit dem brief daz vns die erbern Geistlich herren her Nycla Probst des Gotshaus ze Hertzogenburkch vnd der Conuent daselbs irn gueten willen vnd gunst dar zu gegeben habent daz ich in sand Jacobs Chappelln ze Schawing in irr Pharr ain ewige ta^egliche mess mit ainem Chapplan der da sitzen vnd di verwesen sol gewidempt vnd gestift han. Darumb wir in genuegsam widerlegung getan han mit Neuntzehen phunden wienner phennig di ich in berait gegebn han vnd darumb si zu irm Gotshaus zwelf schilling phennig gelts chauffen schullen Also beschaidenlich daz ich vnd all mein Erben dieselbn Chappelln fu^erwas leichen schullen Vnd daz ain ygleich Chapplan der obgenanten sand Jacobs Chappelln ze Schawing wer der ye zden zeiten ist daz opher daz in derselbn Chappelln geopphert wirt aufhebn vnd selb nemen sol vnd in fu^erwas nichtes davon gepunden sein aber der selb Chapplan sol dhainen gewalt haben pherrlichen rechten ze begen noch dhainerlay heilichait zeraihen ez wer danne mit ir oder irer nachkomen sunder willen vnd v^erlaub, ausgenomen daz er all Suntag den Weichprunn geweihn vnd gesegen mag. Dar zu so nement si aws den Charvreytag sand Gorgentag vnd irs Gotshaus Chirchweigtag daz an den selben drin tagen in der obgenanten sand Jacobs Chappelln dhain Mess gehabt werde noch dhainerlay gotsdinst begangen werde wand die Pharrla^eut an den selben tagen bey irm Gotshaus ir rechten Pharr als ez pillich vnd recht ist beleibn sullen wand auch wir den Gotsdinst mainen ze mern vnd indert ze minnern. Darub verpind ich mich vnd all mein erben an dem gegenwurtigen brief mit vnsern trewn alles daz gentzlich stat ze haben daz vorgeschribn stet vnd schullen da wider fu^erwas nichtes tun in dhainem weg vil noch wenikch. Des ze Vrchund gib ich obgenanter Weykchart von Toppel dem vorgenanten Chloster ze Hertzogenburkch den brief besigiltn mit meinem Insigil fur mich vnd all mein erbn mit Otten Insigil von Toppel meines suns vnd mit vnsers vettern Insigil hern Weykcharts von Toppel zden zeiten vnserr genedigen vrawn der hertzoginn in Osterreich etc. hofmaister der auch der sach zeug ist mit seinem Insigil. Gebn nach Christi gepurd Dreutzehen hundert Jar darnach in dem Neun vnd Sechczkistem Jar an sand Pauls tag als er bechert ist.

Source Fulltext: FAIGL, Herzogenburg (Wien 1886) S. 259-260