ICH Ioerig der Utz vergich vnd tun chund mit dem brief allen leuten dew in sehent vnd horent lesen die nu lebent vnd hernach chunftichk sint. Daz ich mit wolbedachtem muet mit gunst vnd mit gu^etleichen willen. vnd nach Rat mein vnd meins chinde Nyclo daz ich pei meiner Hausfrowen Gedraut dez Huerneins tochter der got genade gehabt han, nachst vnd pesten frevnten ze paider seit vnd nach ander Erber leut Rat mit rechter fu^erzicht vnd mit lozz getailt han mit dem egenanten meim chinde Nyclo alle die gu^eter die her nach geschriben stent die mir mein egenante Hausfrow Gedraut mit gesampter hant hinder ir lazzen hat sew sein mit gelt oder an gelt, vnd auz den selben gu^etern ist mir lo^erigen dem V^etzen an rechtem tail mit lozz geuallen. am Rachen weingarten an dem chamerperig ze nachst petrein dem pirchenworter do man alle iar von dient auf die obern chamer dem gotzhaus vnser vrowen ain viertail vnd drey stauf weins ze perchrecht. vnd ain helbling ze voitrecht vnd nicht mer. Dez perchherre ist der Erber Chorherre her Marichart von Rust die zeit obrister chelner dez gotzhaus vnser vrowen. vnd ist mir geuallen ain haus in der plintengazzen ze nachst dem purgel. do man von dient in der chorherren spitol acht halben phenninge ze gruntrecht vnd drithalben phenninge ze fu^ergedinge vnd nicht mer. dez amptman ist der Erber man lans der Hof er schaffer in der chorherren spitol. vnd ain viertail Weingarten an dem Rosenpuchel ze nachst dem Goldenhofer do man von dient dem gotshaus vnser vrowen fumf phenninge ze Perchrecht vnd ain helblinge ze voitrecht vnd nicht mer. vnd ain viertail weingarten in der Eben ze nachst der zech an dem newsidel do man von dient dem gotshaus vnser vrowen fumf vnd zwainzichk phenninge ze perchrecht vnd ain helblinge ze voitrecht vnd nicht mer. dez perchmaister ist der Erber man Wysent auf dem anger dez alten sluzzler sun. vnd ain Rachen weingarten in dem chochgraben ze nachst Jansen dem pharrer. do man von dient dem gotshaus vnser vrowen nevn stauf weins ze perchrecht vnd ain helblinge ze voitrecht vnd ain phunt geltes ze vberzins hainreich Reymar alz sein brief sagt vnd nicht mer. dez perchmaister ist der Erber man vlreich von Rust. vnd ain viertail weingarten an der weydnichleitten ze nachst maendlein dem sturm do man von dient dem herzogen vier Emmer weins ze perchrecht vnd nicht mer. dez perchmaister ist der Erber man fridreich der zistel di zeit sluzzler. vnd ain halbes jeuch weingarten an dem puchperig ze nachst Eiblein dez wysentz aidem. do man von dient hern Eber harten von Chappell fumf viertail weins ze perchrecht vnd ain helbling ze voitrecht vnd ain phunt geltes ze vberzins in die zeche datz sand Mertein alz ir brief sagt vnd nicht mer. dez auch perchmaister ist der egenant fridreich der zistel. vnd drey Rachen weingarten in dem wolfgraben ze nachst der lonerinne do man von dient den geistleichen herren von pavngartenperig drew viertail weins ze perchrecht vnd drew ort ze voitrecht vnd nicht mer. dez perchmaister ist der Erber man Jacob des alten Sluzzler sun die zeit statrichter. vnd ain haus vnd ain hofstat weingarten dor an gelegen datz sand mertein ze nachst dem zevnaer do man von dient dem hertzogen vier vnd zwainzichk phenninge ze gruntrecht vnd nicht mer. dez amptman ist der Erber man Jo^erig pei dem tor. Dew gu^eter alle sint mir egenanten Jo^erigen dem vtzen geuallen, dor zu schol ich allez daz gelt hintz iuden vnd hintz christen do ich mit gesampter hant in chomen pin. selber richten vnd geben von meiner hab dew mir geuallen ist vnd an meins chinde schaden. vnd mag vnd schol auch mit den vargenanten gu^etern allen furbaz ledichleichen vnd vreyleichen allen meinen frumen geschaffen mit verchauffen mit versetzen machen schaffen vnd geben swem ich wil. So ist meim chinde Nyclo ledichleichen an allez gelt an rechtem tail mit lozz geuallen. ain weingarten dez sechsthalb Rachen ist vnd leit in dem weingraben zenachst einem weingarten haist der phaendel. do man von dient dem gotshaus vnser vrowen zwen Emmer vnd anderthalb stauf weins ze perchrecht zvnd zwen phenninge ze voitrecht vnd nicht mer. dez perchmaister ist der egenant vlreich von Rust. vnd schol auch ich Jo^erig der vt z. daz egenant Chinde Nyclo inne haben so lange vntzen ez ze sein iaren chumpt. so schol ez danne mit dem selben weingarten allen sein frumen schaffen verchauffen vnd versetzen geben swem ez wil. vnd schol im den antburten an allen chrieg vnd ansprach, ich schol auch den weingarten alle die weil vnd daz chinde zu sein iaren nicht chomen ist in nutze vnd in gwer ledich vnd vnuerchumbert inne haben waz ich dez geniezzen mag vnd auch in gu^etem mittern paw an allen sachen also daz er icht geergert werd vnd auch mit gu^eter gewiszen dez chinde frevnt vnd Erber leut. Waer aber daz mein egenantz chinde Nyclo mit dem tode abget ee ez ze sein iaren chumpt dez got nicht engeb. dannoch schol ich Jo^erig der vtz dew sechsthalb Rachen weingarten ze leipgedinge nuer ze main ains tagen in nutze vnd in gwer ledich vnd vnuerchumbert inne haben waz ich der geniezzen mag alz leipgedings recht ist vnd nach meim tode. so schol danne der selb weingarten geuallen. do er danne ze recht hin erben vnd geuallen schol an allen chrieg. Vnd daz die sach vnd allez daz vnd varbenant ist furbaz also staet gantz vnd vnzerbrochen weleib swenne ich Jo^erig der vtz nicht aigen insigel enhab. dez bestaett ich den brief vnd auch dew taylunge mit der egenanten gu^eter aller perchherren. perchmaister vnd amptman insigil. hern Marichartz von Rust die zeit obrister chelner dez gotshaus vnser vrowen. Iansen dez Hofer. Wysentz auf dem anger. vlreichs von Rust. fridreichs des zistel. Iacobs dez alten sluzzler sun dez statrichter. Jo^erigeins pei dem tor. vnder der aller insigil ich mich verpunden hab allez daz staet ze haben daz vorbenant ist vnd sew der sach zeug peten hab mit irn insigiln. Der brief ist geben nach christi gepurde dreutzehen hundert Iar dor nach in dem zway vnd sybentzigisten Iar des freytages var phingsten.

Source Fulltext: FAIGL, Herzogenburg (Wien 1886) S. 264-267