Wir Nycla von gotes gnaden Probst sand Jorigen Gotczhaus ze Hertzogenburch vnd aller vnser Conuent da selbz vergehen offenleich mit dem prief allen lewten de in lesent oder horent lesen daz wier mit gesamenter hant vnd guetem rat recht vnd redleich vnsers gotzhaws freyn aygenhaften guetz verchauft haben ain hoff gelegn dacz Werdarn mit alle den rechten. wierden vnd nu^eczzen ze veld vnd ze dorf gestiphten vnd vngestifften versuechten vnd vnuersuechten alz wir in aygenhafter gewer her procht habn. Also hab wir in ze chauffen gegebn Merten dem Seltensro vnd Chuenigunden seiner hausvrow. vnd allen iren erben vmb zweliff phunt gemainer Wienner phennig der wir ganczleich verricht vnd gewert sein ze rechten ta^egn also beschaidenleich daz der ee gnant Mert der Seltensro vnd sein nochchomen dem vorgenanten vnserm Gotzhaus ze Herczogenburch dor van Ja^erleich raichn vnd dien schol an sand Jorign tag Sechz schilling vnd auch dor noch an sand Mychels tag Sechz schilling gemainer Wyenner phennig vnd nicht mer. Wer auch den ee gnanten hoff hin fu^er in hat der schol vnserm Gotzhaus gehorsam sein mit stewr mit dienst vnd alz daz leyden waz ander vnser holden gemaindleich leydent an all ier wider red. Waer aber daz der ee genant Mert vnd sein erben den vor geschribn hoff vor nat du^erft verchauffen mu^esten. So schulln se dann nu^er einem geleichen pawmann den hoff ze chauffen geben, der vns dor auf nu^eczleich vnd paw^eleich sei. Jz schol auch der ee gnant Mert vnd sein erbn auz dem vorgnanten hoff nichtz versetzen noch verchauffen an vnsern willn vnd rat. wo se dez aber vber gyengen so schulln se dann von allen iren rechten mit ier guetleichen willn gevalln sein, vnd vnser hoff vns dann ledig vnd frey sein an all ier wider red. Wir sein auch dez ee gnanten hoffz recht scherm vnd gewer fu^er all anspruch, waz im dor an abget mit recht daz lob wir im allez auz ze richten an geverd. Daz daz hin fu^er ewichleich stet vnd vnczebrochen beleib. geb wier ee gnanter Probst Nycla von Herczogenburch dem ee gnanten Merten dem Seltensro vnd sein erbn den prief besygelten vnd bestetten mit vnserm vnd vnsers Conuentz payden grozzen anhangunden Insygeln. Gebn noch christ gepu^erd v^eber drewczehn hundert Iar dor noch in dem drew vnd Sw^obenczkisten Iar dez Samitztags noch dem heyligen aufferttag.

Source Fulltext: FAIGL, Herzogenburg (Wien 1886) S. 268-269