Ich Mert der Hutstock von hunczhaym vnd ich anna sein hausfraw wir veriehen offenleichen mit dem brief daz mir vnd meiner hausfrawn enpholichn habent dye erbern Geistleichen herren der probst vnd dye Chorherren von herczogenburch irn vreyn aygen hoff gelegen dacz hunczhaym mit seiner zu^e geho^erung auz genomen all ier weingarten gelegen da selbs daz ich den selbn nuczleich vnd wirtleichen in schol haben vnd in wartund da mit schol sein als ain hofmaister tu^en schol wan aber daz ist daz sy iern vorgenanten hoff mainent ze verwandeln mit welicher wandlung daz ist oder einem andern in antwurten da schol ich in chain irrung noch in vel nicht tu^en nuer daz sy iern frum do mit schaffen schullen mit meinem guetleichn willn an gever mit vrchund dez briefs wan ich vnd mein hausfraw verpinten vns hinter den erbern man mit vnsern treven vrsalchs dye zeit richter datz Mauttorn (sic) daz der sein Insigel an den prief gehangen hat im selber an schaden wan wir in fleizzigleichen gepeten habn. Gebn nach christ gepurd dreuczehen hundert iar dar nach in dem vier vnd Sybenczisten jar an sand Go^ergen tag.

Source Fulltext: FAIGL, Herzogenburg (Wien 1886) S. 274-275