ICH vlreich der Neidekker vnd all mein eriben ich vergich vnd Tuen chund offenleichn an dem prief daz ich recht vnd Redleichn ze chauffen hon gegebn Andrenn dem Aman vnd seiner hawsfrawn Katrein vnd all irn eriben mein haws gelegen ze Minpach⁶⁴ ze nechst der Liechtenegker haws da man von dient ze purchrecht dem Propst von Herczogenburch newn phennig wienner mw^enzz alle iar an sand Michhels tag vnd nicht mer. vmb virczehn phunt phennig wienner mw\enzz der er vns gancz vnd gar gericht vnd gebert hat. vnd also weschaidenleich daz er mir auch mit dem selben haus wartwnd schol sein vnd mir mein wein in einem cheller wehalten schol vnd schol mir mit einem stall wartwnd sein vnd mit einer chamer vnd mit der prezz vnd schol auch ich den prezzern selb lonen vnd schol auch er doron chainen schaden nemen an zerwng vnd schol awch der vorgenant andre vnd Katrey sein hawsfraw vnd all ir Eriben mit dem selben haws all irn frwm schaffen mit versetzen vnd mit verchawffen geben wem si wellen mit allen den Rechten als vor geschribn stet. Wer aber daz in dar an icht abgieng oder chain chrieg auf erstwnd von wem daz wer mit dem Rechten daz schulln sew haben auf mir vorgenanten vlreichn dem neidekker vnd auf all meinen eriben vnd auf alle der hab dew wir haben in dem Lande ze Osterreich oder wo wir sew haben wir sein lemtig oder tod. Daz de red furbaz stet vnd vnczebrochen weleib dar vber gib ich vor genanter vlreich der neidekker den prief versigelt mit meinem anhangunden Insigel vnd mit dez erbern herren insigel Probst nyklazz von herczogenburch sand Iorigen goczhaws. Der prief ist geben noch Christi gepurd dreuczehn hundert iar darnach in dem dreu vnd sybenczgisten iar dez Samicztag an sand Johanstag ze Swnibenten.

Source Fulltext: FAIGL, Herzogenburg (Wien 1886) S. 270-271