Ich Wraw Elspet dez hausler Witib von ressing dem got genad vnd all mein eriben wier veriehen offenbar mit dem brief. daz wier mit woll pedachtem mu^et vnd noch vnser nesten vnd pesten vreunt rat zu der zeit do ich izz mit recht woll getuen mocht verchauft haben. ochtzehen schilling gelzz gellegen ze Chappell. zechen schilling auf pehausten gu^etern vnd ein phunt auf echern vnd auf vber Lend vnd daz ich chauft han von maim ochaiem. Wulfingen dem Ewerga^essinger daz freyes aygen ist. vnd dew man dient auf sand Michellstag vnd ienczvnd aufsiczet Christan vnd Wolfhart der tallfogell. vnd Ott von Chappell. hat sein auch in. dient an zechen, zechen schilling phennig vnd die lauet die her noch geschriben stent. Ott der Leikeb ein ieuch, vnd ein garten dient an aien zwaienczig phennig. Sigell von Chatzenperig drew ieuch dient drey vnd dreizzig phennig. Perharten ze Ressing aien ieuch dient aiendlef phennig. Der Sneblinger aien ieuch dient aiendleff phennig Polltingerin aien ieuch dient aiendlef phennig Larenczin vnd ir snuer zway ieuch dient zwen vnd zwaienczig phennig. Jacob schuester aien ieuch dient aiendleff phennig Chunrat schuester aien ieuch dient aiendleff phennig Stetner aien ieuch dient dreizechen phennig zechentner aien ieuch vnd aien garten dient an aien zwaienczig phennig. Ruedell von chaczenperig aien ieuch dient aiendlef phenning. Larenz in der aw aien ieuch dient aiendlef phennig Elbell von o^eczenstorf aien ieuch dient aiendlef phennig. Eninchel von ressing zway ieuch dient echtedhalbe vnd zwaienczig. PeterPaier von ressing dint an zway dreizzig von zwaien echern. Dev vargenanten gelt vnd gu^eter hab wier verchaueft Chollmans des hiersen chinder. Fridreichen vnd Elspeten vnd allen ieren geswistreiden. dor zu allen ieren errben. vm funf vnd zwaienczig phunt phennig der wir gancz vnd gar gericht vnd gewert sein ze rechten tegen ich pin auch dez guetez ier rechter scherm vnd gewer vor allew ansproch wer affer (sic) daz in hin fu^er mit recht dor an icht abgieng. daz schull wier in ausrichten vnd wider cheren vnd wellichen schaden sew dez nement daz schullen sew haben daz mier egenanten vrawn vrawn Ellspeten vnd auf all den gu^et daz ich hab oder las in dem Lant ze Osterreich. oder wo ich iz hab ich sey lemptig oder tod. dor vber gib ich in den brief versigelten mit der erbern dreier man insigell hern weichartz meins pru^eder msigell vnd hinder Wulfings des Ewergasinger meins ohaiem insigell vnd hinder Walthers von chaczenperig insigell. vnd ich aiegen insigell nicht enhab so verpint ich mich hinder der erbern man dreyer insigell. allz daz stet ze haben vnd laiesten daz var an dem brief geschriben stet wan ich sew dor vmb wlleizz (sic) gepeten han. daz sew der sache zeug sind mit ieren anhangunden insigell. Der prief ist geben noch Christi gepurd drewzechen hundert iar dar noch in dem funf vnd Sybenczgisten iar an sand Pollten tag.

Source Fulltext: FAIGL, Herzogenburg (Wien 1886) S. 277-278