Wier di gancz gemain ze Tyemdorf vnd all vnser nochcho^emen veriehen offenleich mit dem prief allen den die den prief sehent oder ho^erent lesen di nu lebent oder her noch cho^emen, daz wier recht vnd redleich gechauft haben von den Erbern geistleichen herren dem probst ze herczgenburch vnd dem ganczen Conuent gemain da selbs iren hof gelegen cze Teuffental mit allen den nu^eczen rechten vnd eren di do czu^e gehoren vnd als sev in vnuersprochenleich czu irem gotzhaus in aygens gewer her pracht haben. Also mit auz genomen warten auzgenomenleich ain halbs phunt phennig geltz gelegen auf v^eberlent. daz czu den zeiten in den hof geho^ert hat. vnd auz genomen ain wismad. gelegen in Egelseer moz. den obgenanten hof mit alle dev vnd dor czu geho^ert an div obgenanten czway stukch di vor auzgenomen sind, haben wier di gancz gemain cze Tyemdorf vnd all vnserr nachchomen gechauft vmb nev^en vnd czwainczig phunt gemainer wienner phennig der wir sev gancz vnd gar gericht vnd gewert haben cze einem ewigen purchrecht oder waz wier sein geniezzen mu^egen mit welicherlay daz ist. Also weschaidenleich daz wier vnd all vnser nochcho^emen all iar ierleich do von raichen vnd dienen schullen dem probst ze hertzogenburch vnd allen seinen nochcho^emen ain phunt gemainer wienner phennig an sand Merten tag ze rechtem purchrecht vnd nicht mer in dem iar. Wer awer daz wier vnd all vnser nachcho^emen den obgenanten dienst nicht raichen ze rechten tegen als der prief sagt, so schull wier dez wandels verfallen sein als purchrechtz recht ist in dem Land ze O^esterreich vnd wan daz ist daz wier oder vnser nachcho^emen den vorgenanten hof mit einander ganczen hin ga^eben so schol man nimer ze ablait geben denn sechczehen phennig vnd als vil ze anlait. daz macht zwen vnd dreizzik gemainer wienner phennig. Wann awer daz ist daz ainer seinen tail dor an hin geit der schol nicht mer cze ablait geben wenn zwen wienner phennig vnd diser ze anlait als vil vnd nicht mer. vnd schull wier in chainerlai hantraich nicht tuen. wenich noch vil. dann den rechten dienst. vnd schull wier vnd all vnser nachcho^emen fu^erbaz allen vnsern frum mit den egenanten guetern schaffen verchauffen versetzen an allen ierrsal. Daz der chauf vnd div handlung fu^erbaz stet vnd vnczebrochen weleib dor v^eber so geben wier di gancz gemain cze Tyemdorf vnd all vnser nachcho^emen den prief den egenanten. dem probst cze hertzogenburch vnd dem ganczen Conuent da selbs vnd wen wier aygens Insigels nicht enhaben so verpind wier vns hinder vnsers genedigen herren Insigel hern purchhartz. purggraf ze Maydburch vnd graf ze hardek. der ez an den prief gehangen hat durich vnser pet willen. mit vnsern treven allez daz stet ze haben das vor an dem prief geschribn ist vnd dez ist czeug der erber herr her hainreich der aczenpruker von Tautendorf auch mit seinem anhangenden Insigel im an schaden. Der prief ist geben do man czalt von Christes gepu^erd drevtzehen hundert iar vnd dor nach in dem fu^emf vnd Sybenczigistem iar an vnser vrawen tag ze der chu^endung.

Source Fulltext: FAIGL, Herzogenburg (Wien 1886) S. 276-277