ICH Andre vnd ich Hans paid pru^eder von liechtenstain vnnd alle vnser erben wir veriechen vnd tu^en chvnt offenbar mit dem brief alle den di in lesent sechent oder horent lesen die nu lebent vnd hernach chvmftig sind daz wir recht vnd redleich verchaufft haben vnsers rechten ledigen vreyen aygens vnser zwo wisen die gelegen sind nyderthalb herczogenburch in der awe gen sand Andre vber pei der Traysem in herczogenburger phar die ain wis ze nachst dem Purchstal vnd die andre wis nyderthalb ze nagst der hofwis als sew paid mit marichen vnd mit rain ausgemercht vnd gemaricht sind vnd mit alle dew vnd dar zu^e gehort ez sein veliber graben oder wazzerrunsen gestift oder vngestift versucht oder vnversucht mit Steig vnd mit Wegen an allen auszug als wir ez alles in rechter aygens gewer her pracht haben vnd als ez von alter dar zu gehort hat vnd von alter her chomen ist also hab wir ez ich vorgenanter Andre ich Hans paid pru^eder von Liechtenstain vnd alle vnser erben recht vnd redleich verchaufft vnd geben mit alle den nuczen eren vnd rechten vnd da von bechomen mag dem erbern Geistleichen herren Probst Iacoben sand Gorigen Goczhaws ze hertzogenburch vnd dem Conuent da selbs gemaindleich vmb hundert phunt vnd vier vnd zwainczig phunt wienner phennig der wir gancz vnd gar van yn verricht vnd gewert sein ze rechten tegen Also beschaidenleich daz si fu^erbas mit den obgenanten zwain wisen vnd mit alle dew vnd dar zu^e geho^ert ledichleichen vnd vreileichen allen im frum damit schaffen schullen mit verchauffen mit verseczen geben schaffen machen wem si wellent an alln irrsal vnd durch pezzer sicherhait seczen wir vns ich Andre vnd ich Hans paid pru^eder von liechtenstain vnd alle vnser erben vnverschaidenleich vber dew obgenanten zwo wisen vnd alles daz das dar zu geho^ert als ez vor geschriben stet dem vorgenanten herren dem Probst vnd dem Conuent gemaindleich dez obgenanten sand Gorigen Goczhaws ze herczogenburch ze rechtem scherem vnd geweren fu^er alle ansprach als aygens recht ist vnd dez landes recht in Osterreich .... vnd daz der chauff fu^erbaz also stet vnd vnczebrochen beleib dar vmb so gebn wir vorgenant zwen pru^eder von liechtenstain dem vorgenanten herren Probst Jacobn vnd dem Conuent gemaindleich sand Gorigen Goczhaws ze herczogenburch den brief ze einer ewigen vrchund vnd vestigung der sach versigelt mit vnsern paiden anhangunden Insiglen vnd mit meins obgenanten Andres Sunes Perenharcz von liechtenstain anhangenden Insigel vnd dez sind geczeug her haynreich von winchel vnd her wernhart der Drugsecz von Reichestorf mit irn anhangunden Insigeln in an schaden. Der brief ist geben nach Christi gepurd drewzehen hundert iar dar nach in dem achczigisten Iar dez Samstages vor sand Gorigen tag.

Source Fulltext: FAIGL, Herzogenburg (Wien 1886) S. 295-297