Urbanus episcopus seruus seruorum dei. Dilecto filio . . . Abbati Monasterii sancte Marie Scotorum in Wienna Patauiensis diocesis Salutem et apostolicam benedictionem. Ad audienciam nostram peruenit, quod tam dilecti filii. . . Prepositus et Conuentus Monasterii in Hirzenburch per Prepositum soliti gubernari ordinis sancti Augustini Patauiensis diocesis quam predecessores eorum decimas, terras, domos, uineas, grangias, piscarias, castra, casalia, prata, stagna, lacus, pascua, nemora, molendina, redditus, possessiones, iurisdictiones et quedam alia bona ipsius Monasterii datis super hoc litteris confectis exinde publicis instrumentis iuramentis interpositis factis renunciacionibus et penis adiectis in grauem ipsius Monasterii lesionem, nonnullis clericis et laicis aliquibus eorum ad uitam quibusdam uero ad non modicum tempus, et alns perpetuo ad firmam uel sub censu annuo concesserunt, quorum aliqui dicuntur super hiis confirmacionis litteras in forma communi a sede apostolica impetrasse. Quia uero nostra interest super hoc de oportuno remedio prouidere, discretioni tue per apostolica scripta mandamus, quatinus ea, que de bonis ipsius Monasterii per concessiones huiusmodi alienata inueneris illicite uel distracta non obstantibus litteris, instrumentis, iuramentis, renunciacionibus, penis et confirmacionibus supradictis ad ius et proprietatem eiusdem Monasterii legitime reuocare procures Contradictores per censuram ecclesiasticam appellacione postposita compescendo. Testes autem, qui fuerint nominati si se gracia, odio, uel timore subtraxerint censura simili appellacione cessante compellas ueritati testimonium perhibere. Datum Rome apud Sanctum petrum XII Kal. Nouembris Pontificatus nostri Anno Quarto.

Source Fulltext: FAIGL, Herzogenburg (Wien 1886) S. 302-303