Wir Probst Iacob zu Herczogenburch vnd der gancz Conuent da selbs veriehen vnd tun chunt mit dem prief allen lewten die da lebent vnd hernach chu^enftig sind daz vns vnd vnserm Goczhaws' den Chorhern auf die Oblay der Erberg Stephan der Pokch von Chueffarn vnd Margret sein Hawsfraw vnd ir erben lawterleich durch got vnd hail ir vnd aller irr vadern sel willen ze hilf vnd ze trost geben vnd gemacht habent ain phunt gelcz gelegen dacz Chuffarn auf behawsten vnd auch v^eberlent gutern alz ir prief lawten die sye vns daruber geben habent, Also beschaidenleich daz der egenant Stephan der Pokch vnd Margret sein Hawsfraw die egenanten gu^eter da daz phunt gelcz auf ligkund ist inn haben schol nuczen vnd niezzen ir lebtag wann se aber payde mit dem tod ab gen so ist vns dann daz egenant phunt gelcz auf die Oblay ledig vnd frey. Wir verpintten vns auch hin fu^er ewigchleich noch de vnd wir der nu^ecz gewaltig werden dem Egenanten Stephan dem Pokch vnd Margreten seiner Hawsfrawen vnd aller irr vadern selen hilf vnd trost willen alle Iar an sand Clementen tag dez abencz ein gesungnew vigilig vnd dez margens ain gesunges selampt alz sitleich vnd gewonleich in vnserm Closter ist. Wa^er aber daz daz wir dar vmb saw^emig wern wann man vns darnach mant in eim Ma^eneyd so schull wir volpringen den Egenanten gocz dinst tat wir dez nicht so schullen die nachsten frew^ent die egenanten nu^ecz dez selbigen jars geben armen lew^etten wo sye hin wellent mit vnserm gutleichen willen on allen chrieg vnd widerred. Daz daz also sta^et vnd vnzerprochen hin fu^er beleyb. geben wir egenanter Probst Jacob zu Herczogenburg vnd der gancz Conuent da selbs dem Erbern Stephan dem Pokch von Chu^effarn vnd seinen Erben, den brief versigelten mit vnsern payden anhangunden Insygeln. Geben da man zalt von Christi gepu^erd drewzehen hundert Iar dar nach in dem Syben vnd achtzigstem jar an Sand Mathews dez heyligen zwelfpoten vnd Ewangelisten tag.

Source Fulltext: FAIGL, Herzogenburg (Wien 1886) S. 320-321