ICH Peter Gerung von Ressendorff vnd ich Margret Sein Hausvraw vnd ich Andre Chu^eebl von Trautmanstorff vnd ich Sophey sein Hausvraw vnd all vnser Erben veriehen vnd tun chund offenleich mit dem prieff allen levten Gegnburtigen vnd chunftigen di in sehent oder ho^erent lesen das wir mit woluerdachtem mu^et vnd gunst vnser na^egsten frewnt vnpedbungenleich zu der zeit da wir es wol getun mochten recht vnd redleich gebn vnd gemacht haben vnser vrawen Gotzhaus in dem Piriech ze Salapulka oder wer pharrer da ist Sech czig phennig gelcz wienner munizz zu ainem Ewigen Iartag den wir alle jar pegen schullen des Na^egsten Suntages nach Sand Niclas Tag des Suntages nachts mit ainer gesungen vigilig vnd an dem Montag mit ainer gesunngen sellmes vnd schol auch man gedenchen der Sel als gewanhait ist in der Christenhait vnd die Selben sechczig phennig gelcz hab wir chaufft von O^ettlein von Trautmanstorff di er gehabt hat von mir Egenanten Peter Gerungen auf meinem lehen da ich auf yeczund siczunt pin mit aygem Ruk dar auf wir die Sechczig phennig gelcz gemacht bestett vnd ge Ewiget habn vnd das selbig lehen gelegen ist in Weyderuelder Pharr zu Ra^essendorf zu nachst Chnapp Niclasen vnd Petermans ir paid hewser ledigs vnd vnuerchumerts mit allen Nutzen wir habn auch di vorgenanten Sechczig phennig gelcz auf das egenant lehen chauft zu rechtem vreyem purkrecht vnd habn das getan Nach Rat vnsers Gena^edigen herrn Probst Iacobs zu herczogenburch vnd des Ganczen Conuennts des Heyligen Hern Sand Go^erigen da selbs also das ich vorgenanter Peter Gerung oder wer das lehen nach mir inn hat vnd pesiczund ist mit aygem Rukk hin fu^er Ewichleich davon nicht anders raihen nach Geben schol nur di Sechczik phennig Gelcz zu dem Iartag vnd wer das das ich oder wer das lehen inn hiet die obgenanten Sechczik phennig Gelcz niht geb zu dem rechten tag als man den Iartag pegen schol so schol ich oder wer es inn hat veruallen sein ains phuntz Wachs zu den Sechczik phennig gu^elcz vnser vrawen Gotzhaus da selbs zu Salapulka Wir melden auch das wan das lehen verchauft wirt zo schol man ainem pharrer zu Salapulka gebn zwen phennig zu ablait vnd zwen zu anlait vnd melden auch das wer das lehen inn hat das er vrey ist vor robot vnd stewr ausgenomen gewaltiger stewr Dar vmb so gib ich obgenanter Peter Gerung vnd ich margret sein hausvraw vnd ich andre Chu^eebl von Trautmanstorf vnd ich Sophei sein hausvraw vnd all vnser Erben den prief versigelten mit der zwaier man Erbern Insigel Jansens des Pruczendorffer von Plew^esing vnd Perichtolcz des zowels von fuknitz das sew der sach geczeug sind mit irn anhangunden Insigel in an schaden wan wir vns verpinden mit vnsern trewn alles das stet zu haben das vor geschriben stet an aydes stat. Gebn nach Christi gepurd drewczehen hundert Iar dar nach in dem Suben vnd Achczkistem jar des Sampcztages nach vnsers herrn Leichnam Tag.

Source Fulltext: FAIGL, Herzogenburg (Wien 1886) S. 319-320