Ich Goerig dye zeyt zw Hawnoltstain vnd ich Stephan sein prueder dye zeyt pharrer ze Chwrenberch vnd all vnser erben tun chund allen la^euten die gegenwurtigen vnd zw chunftig synd dye den prief sechent oder ho^erent lezen. daz wir gegeben haben zw den zeyten do wir ez wol getu^en machten mit gunst vnd rat all vnser geerben den erbern geystlichen herren zw Herczogenburch vnd iren ganczen convent pesunder zw irr chirichen zw Rewdnich drew tagwerch wizmat dy do ligent nyderthalb Drestorf auf dem Tulnerveld vnd haist in dem moz vnd do von man jerleich dient gen Atznprwkch sechs gemainer wienner phennig an sand Michels tag zw rechtem purkchrecht vnd nicht mer Also daz dye selben egenanten drew tagwerch wizmad mit aller ir zw geho^erung Schullen vnuerchumert hin fur ebichleich beleyben pey dem vorgenanten goczhaus zw Ra^ewdnich vnd sol auch ein isleich pharrer do selbs daz fu^erbaz ledichleich vnd freyleich mit allen nu^eczen inn haben nuczen vnd niessen vnuerchumert dem goczhaus wie in daz aller pest chu^empt gewellet vnd fu^eget an gever vnd dar vmb haben vns dye egenanten herrn versprochen vnd auch gelubet mit trewn an aydes stat daz ein yedleich pharrer ze Ra^ewdnichk den sy auz irem Conuent dohin seczen beleichten schol hinfu^er ebichleich ein ebigs nacht liecht vor sand Nyclos Alter zw Raewdnichk vnd sol auch alle jar jerleich hinfu^er ebichleich ainn ewigen Iartag pegen got zw lob vnd ze eren vnd ze hilf vnd ze trost der vorgenanten herrn herrn lo^ergen vnd herrn Stephans paid pru^eder selln vnd allen iren vodern vnd nachchomen vnd alln glawbigen selln dez nachsten montags nach sand Bartholomes tag also beschaydenleich dez Suntags abencz vor schol man leyten zw der vigilich alzz gewo^endleich ist vnd ain vigilig singen mit newn leczen vnd dar nach dez morgens am montag schol man auch la^ewten zw dem goczdinst vnd sol auch singen ain selampt vnd zwo mess sprechen vnd in dem Ampt vnd den mezzen sol man gea^echtnu^ezz haben der vorgenanten paid pru^eder sell vnd all irr vordern vnd nachcho^emen sel vnd aller gelawbigen sell all jar ierleich dez selben Suntags vnuerzogen. Wer aber daz daz daz vorgenant liecht fu^er sich also nicht wurd auz gericht vnd der vorgenant Iartag vnd goczdinst nicht genczleich also volpracht wurd zw dem tag so vorgenant ist welichs jars ein pharrer ze Ra^ewdnichk dar in sawmig wer alzz oft daz geschiecht daz schol er alzz oft derstotten darnach ynner acht tagen vnuerzogen. Ta^et er aber dez nicht so mu^egen sich dy nachsten erben der vorgenanten paid pru^eder oder sew selben mit vollem gewalt dez obgenanten wizmad genczleich vnderwinden mit allen nu^eczen zwgeho^erung allz lang vnczt daz dy sawmung dez obigen nachtliechcz vnd dez egenanten Iartags vnd goczdinst genczleich wirt volpracht alzz vor geschriben ist. Wann daz allez geschiecht so ist daz obgenant wizmad dann genczleich von vns ledig vnd los vnd daz lub wir in auch genczleich stet ze halden mit vnsern trewn an aydez stad alz daz daz in dem prief geschriben ist vnd dez zw einem worn vrchund gib ich Stephan dye zeyt pharrer zw Chw^erenperch den offen brief versigelten mit meinem anhangundem Insigel vnd zw einer pezzern sicherhait vnd zeugnuzz hab ich gepeten den erbern Ulreich den Trayzzmer der dye zeyt meiner herrn von Newnburch verweser vnd Amtman do selbs ist gewesen daz er der sach zeug sey mit seinem anhangundem Insigel im an schaden. Der prief ist geben nach Christi gepurd drewzehenhundert Iar und dar nach in dem Newn vnd Achczkistem Iar dez andern Suntags in der Vasten.

Source Fulltext: FAIGL, Herzogenburg (Wien 1886) S. 323-324