Ich Mathes von Haedrestorf vnd ich Katrey sein Hausfraw vnd all vnser Erben wir vergehen vnd tun chunt offenlich mit dem brief allen La^ewten gegenbu^ertigen vnd Chunftigen die den brief lesent oder ho^erent lesen, daz wir . . . Recht vnd Redlich verchauft haben vnsers rechten vreyn ledigen aygens vnsern Weingarten der gelegen ist zu Intzestorf ob dem Puerchstal genant der Praitacher den wir von dem Erbern herrn hern Hansen von liechtenstain Chauft haben vnd alz er auzgemaricht vnd gestaint ist mit alle dew vnd darzu^e geho^ert Ez sei gestift oder vngestift versucht oder vnversucht wie daz genant ist an allen auzczug vnd alz wir den in aygenz gewer herpracht haben also haben wir den vorgenanten Weingarten verchawft vnd ze Chawfen geben dem Erwirdigen geistlichen Herren Probst Jacoben ze Hertzogenburch vnd dem ganczen Conuent daselbs auf ir oblay vmb an ains Vierczikch phunt Wienner phennig der wir gancz vnd gar verricht vnd gewert sein zu rechten (tegen) an allen schaden also weschaydenleich, daz sew vnd all ir nachkomen mit dem vorgenanten Weingarten allen iren frum schullen schaffen mit verchauffen verseczen geben machen wem sew wellen an alle irrung vnd sein wir Ich egenanter Mathes von Ha^edrestorf vnd ich Kathrey sein Hausfraw vnd all vnser erben dez obgenanten Weingarten ir Rechter scherm vnd gewer fu^er all ansprach. . . . Vnd dar v^eber zu einem waren vrchund vnd Ewigen .vestigung der sach geben wir ich Egenanter Mathes von Ha^edrestorf vnd ich Katrey sein Hausfraw vnd all vnser Erben dem vorgenanten Probst Jacoben zu Hertzogenburch vnd dem Conuent daselbs den brief versigelten mit meinem aygen anhangunden Insigell vnd haben auch vleizzig gepeten den Erbern Hansen den Olachter vnd Chunraten den Fla^eming Petren den Graull vnd Cholman den hirzzen daz sew der sach zeug sind mit yeren anhangunden Insigeln yn vnd iren Erben an schaden. Geben nach Christi gepurd drewczehen hundert iar darnach in dem Newn vnd achczigisten iar zu Mitter Vasten.

Source Fulltext: FAIGL, Herzogenburg (Wien 1886) S. 324-325