ICH Hainreich der Wultzendorffer ich Angnes sein Hawsfraw Wolfgers seligen des Reichersperger tachter von frewntshawsen veriehen fu^er vns vnd fu^er all vnser erben vnd tu^en chund mit dem brief allen lewten gegenwu^ertigen vnd chumftigen vmb die dreizzigk vnd drew phunt phennig gelts gelegen ze Lewbs auf bestifftem guet die freizz aigen sind, die der obgenant Wolfger der Reichesperger saeliger geschaft hat zu dem Gotshaws des heiligen herrn sand Johannes ze Nuzdorf durch seiner vnd seiner vodern vnd auch nachchumen sel hail vnd selden willen daz wir vnd all vnser erben hinfu^er daz selb geschaeft stet haben wellen vnd sullen also daz ein iegleich Pharrer da selbs ze Nuzdorf dovan begen schol ainen ewigen iartag dem selben Reichersperger vnd seinen vodern vnd nachchumen ierleich des Mitichen nach sand Cholmans tag, als her nach geschriben stet von erst des nachts mit einer ganczen vigili vnd vier liecht auf dem grab da schol der pfarrer von geben dem gesellen zwelif phennig, vnd dem Chapplan ze sand Katrein zwelif phennig vnd dem Chapplan ze Reichersdorf zwelif phennig. Vnd des margens ain selampt vnd ain fronampt vnd zehen mess die darzu gesprochen schulln werden ze trost vnd ze hilf den selben selen vnd aber vier liecht auf dem grab vnd schol der Pfarrer die selben herrn all auzrichten mit der chost ain mal vnd schol iegleichen herrn darzu geben sechgs phennig vnd dem mesner sechgs phennig Ez schol auch der selb Pfarrer desselben tags haben zehn arme mensch vnd sol die ainmal speisen vnd geben iedem menschen ainen phennig allez ze hilf vnd ze trost den selben selen. . Wir sulln auch ierleich vnsern scheinpoten dapei haben daz daz allez also volpracht werd der auch ain mal mit dem Pfarrer haben schol vnd nicht mer. Wer aber daz ez also allez nicht volfu^ert wu^erd als geschribn stet welichs iars daz geschech so schull wir vns oder vnser erben der selben nuczz desselben iars gancz vnd gar vnderwinden vnd die geben wem wir wellen an alle irrung. Daz obgenant gescheft lub wir allez stet ze haben mit vnsern trewn an geuer. Vnd des ze vrchund gib ich vorgenanter Hainreich der Wultzendorffer fu^er mich vnd fu^er mein obgenante hawsvrawen vrawn Angnesen vnd fu^er all vnser erben dem erwirdigen gaeistlichen herrn Brobst Jacobn ze hertzogenburch vnd dem ganczen Conuent daselbs den brief versigelt mit meinem anhangunden Insigel darzu haben wir ùeizzich gepeten vnser lieben frewnt Leben den Druchsetzzen von Gotzesdorf vnd Chu^enraten den fleming daselbs vnd auch Chu^enraten den frewntshawser daz si daz selb gescheft mit sampt vns bestett vnd beczeugt haben mit irn anhangunden Insigel. Der brief ist geben nach Christi gepurd drewzehen hundert iar darnach in dem Newnczgistem iar des Suntags vor vnser vrawn tag zu der Liechtmess.

Source Fulltext: FAIGL, Herzogenburg (Wien 1886) S. 328-329