ICH hanns der Tanpruger vnd ich daniel mein brueder (sic) vnd all vnser erben veriehen vnd tun kund offenlich mit dem brief allen den die in sehent oder horent lesen die nu lebend vnd hernach kvnftig werdent das wir mit wolbedachtem mu^et vnd zu der zeit do wir es wol getun mochten vnd nach rat vnser pesten nagsten frewndt verkaufft haben vnd verkauffen mit dem brief vnsers rechtenn freyns aygen ain weinczuerl gericht gelegen ze nusdorff da auf zu den zeytten gesessen ist nyklas der plerer mit aller seiner zuegehorung als wirs gehabt haben vnd vnser vorvodern lange Iar es sein wysmad akcher weingarten nichts ausgenomen recht als iz staint vnd geraynt ist von alter her also hab wir es ze kauffen gegeben den erbern Gaystlihen herren dem Conuent zu Herczogenburg vmb an ayns Sekchig phunt wyenner phenig der wir gancz vnd gar verricht vnd gewert sein zu rechten ta^egen Ez schullen auch hinfu^er die herren mit dem gu^et allen iren frum damit Schaffen verseczen verkauffen machen vnd geben wem Si wellen mit vnserm gu^etlichen willen vnd an alle Irrung. Auch ist ze merkchen das nyklas der plerer oder wer auf dem gu^et siczet pawn sol das Jeuch weingarten gelegen pey dem Schawnberger in der pewnt zu geleihem paw vnd ein pawngarten gelegen ze nagst des Chunraten des potinger pawngarten dauon man dient la^erlich einen emer most in dem lesen in des Schawnberger gu^et auch hab wir inn ze kauffen gegeben anderthalb emer weindienst den do dient hensel Chaltsmid oder sein nachkomen von einem pawngarten in das vorgenant gut vnd vier phennig gelts der do dient ein ysleicher pharrer ze nusdorff von einem halben Jeuch weingarten gelegen an dem Kyrichperig vnd ein tagwerich wysmad gelegen nahen bey Kagran Wir sullen auch des vorgenanten guts ir rechter Scherm vnd gewer sein vor aller ansprach . . . des zu vrkund vnd pesser Sicherhayt geb wir inn den brief versigelt ich vorgenanter hanns Tanpruger von Mursteten vnd daniel mein brueder mit vnserm aygen anhangundem Insigel vnd des ist auch geczeug vnser lieber Swager Thoman der Schellinger mit seinem anhangundem Insigel Auch hab wir vleyzziglich gepeten Chunraten den Frewntshawser das er der sach czeug ist mit seinem anhangundem insigel im an schaden. Der brief ist Geben nach Kristi gepurd drewczehenn hundert Iar dar nach in dem Sechs vnd newnczigistem Iare des nagsten Montags achtag noch O^estern.

Source Fulltext: FAIGL, Herzogenburg (Wien 1886) S. 346-347