Nos Martinus dei gracia prepositus Monasterii in Herczogenburg patauiensis diocesis profitemur publice communicacione presencium et recognoscimus quod tenebamur soluere dilectis nostris fratribus et dominis nostro Conuentui ibidem quinquaginta septem libras denariorum monete wiennensis quas nobis prefati matura deliberacione ad vtilitatem nostram caritative acomodauerunt ne igitur predicti fratres et domini nostri conuentus aliquas intrarent iacturas et dampna de memoratis solucionibus bona voluntate prehabito consilio Nos Martinus sepe dictus dedimus et damus libere dilectis nobis dominis et fratribus nostro conuentui vnam vineam sitam in lindeprunn de iure et licite nobis aduolutam per introitum et professionem religionis cuiusdam dilecti nostri fratris Johanis filii carnificis Stephani pie memorie in refusionem et in releuamen de cetero tenendam et habendam pretaxatam vineam cum ea faciendum omni obstagio postergato quod melius decreuerint ad ampliores prouentus ac emolumenta sicut ipsis congruencius ad vtilitatem oblagie videbitur expedire et per presentes nostras literas sigillo nostro appenso ipsos quitamus de quinquaginta et septem libris et volumus eos esse plene persolutos et quitatos harum testimonio literarum Datum in Crastino corporis christi in die sanctorum Marcellini et Petri Anno Domini millesimo Trecentesimo nonagesimo sexto.

Source Fulltext: FAIGL, Herzogenburg (Wien 1886) S. 347-348