Lieber gena^ediger Herr/ Wir armlew^et van Strayczesdorff lassen ewr gnad wissen vnserew recht/ dew wir haben Indem veldgerich inderhalb des Camps/ in geleicher mass alls vnser ve^ater van ewrn vavadern saligen her pracht vnd gehabt haben Alls man dy all iar dreystund derkchendt in dem rechten zu prunn/ var ewrem gewaltigen Richter Bitn wir ewr gnad/ das ir vns da bey behalt/ vnd vns vnser nachkomen dabey lasset beleyben/ wann wir sprechen bey vnsern trewnn vnd ayd/ den wir ewch vnd ewrn vadern geswaren haben/ das ir vnser rechter erb vogt seyt/ vnd nicht pet vogt/ Item von ersten So melden wir das sich ewr veldgericht anhebt/ an dem Eselstain do der prunnhengst nyder veldt/ vnd get mittn in der landtstrass/ durich gererstorff naw/ vntz mittn Inden Champp/ vnd Inden altn Champp naw vnd mittn in dew nawfart/ vnd in der Twennaw hern gegen vntz neben pru^effinger ekch\Was wandelwe^artiger sach sich in dem chrays verget/ von wann der man sey oder kchumpt/ wes dye gueter sind So der tayl wir dye wandel nyempt/ wenn ewch vnd ewrm gewaltigen Richter/ Auch lass wir ewch vnd ewr genad wissen/ das ewr veldrichter dreystund schol siczen an dem Rechten in dem Iar/ vnd lassen ewch wissen/ das alle dye da zu schaffen habent/ bey dem rechten/ vmb erber sach/ dye schullen freyung haben des selbigen tags wann ersitzt andem rechten/ Item den ersten tag schol er sitzen des nagsten Mantags nach vnser frawnn tag zu der liechtmess zu prunn den andern tag schol er sitzen des nagsten Mantag nach sand Georgeil tag/ auch zu prunn/ Den drittn tag schol er sitzen/ des nagsten Mantag nach vnser frawnn schydung/ vnd vmb denselbigen sitz schol man Im raichen albeg LX d./ von y\eglichem taiding/ das ist dreystund in dem Iar/ dy selbigen LX d. schol er an anders nyempt vadern/ den an des gotzhaws Amptman van Hertzogenbu^erg/ wer der ist vber das gut zu Straytzesdorff mit seiner zuegehorung Auch schol der selbig amptman dem selbigen Richter alle Iar raichen zu vaschang XXXIII vaschang hw^enner/ von dem selbigen guet/ oder fur yedew henn vier phenning Auch schol der selbig amptman dem selbigen Richter all Iar raichen VI ß d. zu landtading zu weinnachten/ vnd ob der amptman des vogtrechts alles von gewalt oder var armu^et nicht bechomen chu^ent So schol er dem Richter dorauff rayttn vnd zelln/ den richter hat er domit gericht vnd gewert Auch muessen dyselben arm lew^et dem hertzogen all Iar raichen vnd geben von yedein lechen X metzen habern/ marchfueter Auch hab wir das recht/ wann wir zu den te^ading komen/ das wir vargenant Straytzesdorffer schullen taydingen vor den prunnern/ vnd vnserew recht derkennen/ Auch schullen wir/ alle dye zu den te^adingen gehorent chamen an den drin tagen in dem Iar/ alls var benant sind/ er pring dann an den tag/ das in irr ehafft nat/ twet er des nicht so ist er XII d. zu wandel/ Auch lass wir ewr genad wissen/ all dye wanndel dye wir melden/ in offner Schrann Item Swert zukchen/ messer zukchen/ in geuer/ vnd doch an schaden XII d. zu wandel ob er furkumpt ee das der Richter gesessen ist Ist aber der Richter gesessen mit dem sta^eblein/ so ist das wandel XXIIII d. Item fliessund wunden LXXII d. dy LX dem Richter dy XII dem Amptman Item plik wunden oder lern/ wye dew genant ist zu wandel V lib. d./ Item wer ainen siccht mit offner hanndt V Hb. d. zu wandel/ twet er dye hanndt zu l lib. d. zu wandel/ Item ob zwen sich miteinander raufften alls manig vinger in dem har/ alls manig phunt Item ain nachwu^erff mit ainem messer/ zu wandel V lib. phenning/ mit ainem stain l lib. d. / mit ainer hakchen l lib. phenning/ Item ob ainer spant in geuer er schyess oder nicht l lib. d. zu wandel/ Item glitzschen spiess ob ainer dew awstrayt in geuer/ vnd piderbt VI ß vnd zwen d. zu wandel/ Item von ainem slechten werichzewg XII d. zu wandel/ Item ob ain man den andern slu^eeg das man den tad besargt/ dy weyl der wundt man ain vedern mag gerueren/ mit dem adem vor dem mund/ so sol der schuldig man des Richter huld geuachen/ vmb V lib. d. zu wandel/ vnd schol ym dy vergueten das der Richter vnbesargt sey So schol der Richter den schuldigen man hilflich sein gegen dem stat gericht/ vnd gegen seinen veinten/ ob das we^ar das sy an das tar kemen vnd dy weyl der wundt man lebt So schol ym der Richter hinden douan helffen auf ain freyung vnd schol yn mit der v^eber mass wann er beczalt wirt seiner V lib. d./ seinen frum lassen schaffen/ in das lant vnd aws dem lanndt/ wo ym sein nat hin geschyecht/ Item ob ainer dem andern zu lu^esemt in geuer es sey weyb oder man/ was dem selbigen geschiecht mit slegen oder mit sto^essen aws dem haws/ des schol der wiert vnd sein hawsgesindt vnengolten sein gegen dem gericht/ vnd schol dennoch der selbig der do begriffen wirt sein vmb VI ß vnd vmb n d. zu wandel Item ob ainer den andern haymsuecht mit warten oder mit werhen / das er das an den tag mag pringen mit slegen oder mit sto^essen/ oder mit zewgnuss So ist er VI ß vnd zwen d. zu wandel/ alls offt ers twet/ vnd ob ainer veintschafft hyet/ vnd sein twr nicht wol verslossen we^ar oder ob man im dye auff styess/ vnd hin yn lieff wye vil ir sind hin yn gelauffen/ yeglicher vmb VI ß d. vnd zwen d. dem gruntherren/ vnd her aws vmb VI ß d. vnd II d. dem veldrichter zu wandel/ Item ob ainer dem andern nachge^et aws ainem andern gericht in das veldgericht/ vnd wirt begriffen/ der ist zu wandel VI ß II d./ vnd allen den harnnaschs den man bey ym begreyfft/ es sey armbst/ spyess/ oder swert/ des ist er veruallen./ Item man schol vnser dhainem verpieten in Ste^aten oder in Ma^erkchten oder var Kyrichen/ an zu red setzen. (sic) vnsers amptman/ oder vnsers richter/ Wer das doru^eber twet/ vnd nyempt zu red setzt/ der ist vmb das wandel ein gast VI ß II den. ein vogtman LXXII d. vnd schol den verpoten von der herberig richten/ Auch ob ain man den andern slueg mit aim scheyt/ der ist zu wandel VI ß II d. item mit ainem swert mit palg mit tal LXXII d. zu wandel/ Item ob ainer durch das dorff rit/ fu^er oder gieng/ vnd schaden te^at an lew^etten oder an viech so schullen in dye nachpawrn vachen/ in des Richter names/ vnd schullen des vnengoltn sein gegen dem gericht fu^eer er v^eber ain viech/ vnd wolt sich geren mittn nach der nachtpawrn rat/ an no^ettung So ist er nicht wandelwertig/ Mu^est man aber yn notten dorzu So ist er wandelwertig VI ß II d. Te^att er aber schaden an ainem menschen/ das schol er puessen nach dem vnd er gewaricht hat/ vnd alls dy nachpawrn erchennent/ Item ke\am ain chu^etzel dewpp in das dorff/ vnd trueg ainem sein hab hin/ vil oder wenikch/ vnd wurd das nachgelau^eff/ das er das liess uallen/ das schol man aufheben mit ainer gewissen/ vnd schol es legen hintz dem amptman der selbig schol das dem Richter in geantbu^erten/ Item kem ain rechter dewpp vnd prech aim sein ere/ vnd auff sein gut So schol ain nachpawr mit dem andern auff sein ob das geschray wu^erd/ vnd schullen in vachen mit slegen mit we man in dann geuellen mag/ vnd schol des yeder man gegen dem gericht vnengolten sein/ wer das verle^ag mit willen der we^ar zu wandel LXXII d. vnd schol der selbig dewpp v^eber nacht ligen hintz dem Amptman vntz daz er das dem veldrichter empewt/ der sol in denn vegsen mit sambt dem guet vnd sol in behalten an den dritten tag vnd sullen dem Statrichter zu wissen tw^enn der sol in vegsen an dem dritten tag/ vnd dy hab dy er verstollen hat/ dy sol dem veldrichter peleyben/ vnd der selbig sol dem Statrichter geben LXXII d. zu fu^er vachen/ vnd sol in dem Statrichter geantburten alls er mit gu^ertl vmb vangen ist/ vnd ob der Statrichter sawmig we\ar/ vnd nicht ke\am an dem dritten tag/ so sol in dy gemain mit dem veldgericht awsfu^eren zu dem valtar/ vnd sullen in da pinden mit aim ru^eghalben/ stet er lang oder ku^ertz/ des sind sew gegen dem Statgericht vnengolten/ wurd er aber pegriffen inner haws/ so ist dy hab dennoch des wiertz/ vnd den dewpp sol man geantburten/ da er pillich hingeho^ert/ alls var benant ist/ Liess man in aber hin mit willen/ wer der we^ar/ der hyet sich des gerichtz vnderwunden/ Auch lass wier ewch wissen daz wier ain graben haben/ da mit wier vns weren der Twennaw/ wer vns den selben mit willen durichliess/ vnd liess daz wasser auff vns/ der ist zu wandel nach yedem nachpawrn VI ß II d. vnd sol vns vnser sche^aden abtragen vnd wann dy Twennaw gras wirt/ daz der Amptman den graben will machen vnd dy nachpawrn zu im vadert wer sawmig wer/ der ist vmb daz. wandel ain pawr vmb XXII d. ain hawer vmb XII d. Auch sind dy herren von hertzogenbu^erg pessrer/ inner haws/ awsgenamen drey sach/ tadtsleg/ dyephait/ natla/ der ist pessrer der veldrichter/ Auch alle dy weg dy vmb daz dorff gent/ dy sind genumen warden von meiner herren gueter von hertzogenbu^erg/ wer vns dy enget/ vnd sich nicht frewntlich mittn wolt der w\aer zu wanndel nach yedem nachpawrn VI ß II d./ vnd sol vns vnser weg rawmen Auch lass wier ewch wissen/ daz wier am awsgemesnew viechtrifft haben durich teysser vnd Slicherstorffer veld/ vnd zu Slichkerstorff durich daz dorff/ pei der patstuben an zuslachen/ wer vns dy enget mit vergraben oder mit verstossen/ der we^ar zu wanndel nach yedem nachpawrn VI ß II d. vnd sol vns vnser waid wider rawmen/ ta^et er des nicht/ so sull wier daz gericht zu hilff nemen/ vnd sullen dy selb rawmen/ vnd sullen auch auff vnser viechtrifft treiben/ wann vnd alls offt vns des nat geschiecht/ Alle dye dew viech auff der waid hyeten/ vnd guet darumb nemen/ den sol man daz weren/ Wer im daz nicht weren liess/ der ist von yedem Hawpp XII d. zu wanndel/ vnd dem Richter Kchnecht vnd den nachpawrn van yedem hawpp IIII d. zu vertrinkchen Auch ist vns dy waid frey/ vnd ist also von alter herkomen/ daz wier kain waid phennig noch dienst dauan nicht geben/ Auch alls verr vnser pu^erkchfrid sagt/ alls verr meld wier dy vargenanten wandel Auch ob ainer den andern v^eberza^enicht oder vber hawt/ oder vber akchriet/ an den rain in geuer der ist VI ß II d. zu wanndel/ vnd enem den grunt wider ze rawmen Auch ob ainer^e dem andern den Marichstain awswu^erff, der ist dem gericht veruallen auff gnad Auch sol ain man den andern nicht pesagen/ Wer daz doruber ta^et/ der we^ar vmb alle dy wanndel/ da er enn vmb pesagt Auch ob ain man den zadern v^eberzimriet der ist VI ß II d. zu wanndel/ vnd sol daz zimer absetzen auff das recht marich alls daz dy nachpawrn derkennen Item ob ain eeweib dy ander vbelhandliet/ dew ist zu wandel VI ß II d. Macht sy den man zarnig daz er sich selber re^ach daz sol man derkennen zu prunn in der schrann dy zwo gemain/ was der verwanndelt hab Item ob ainer ein freys weib slueg/ oder ain frehayt/ oder ain schering/ der ist zu wanndel IIII d. Auch sol ain nachrichter/ oder ain veldscherig/ nicht mer vertrinkchen hintz ainen leytgeben den ain phennig/ vnd sol dann awsgen Item all panfrid winter vnd sumer sullen gefridt sein/ gescha^ech aber ainen icht schaden/ dy sol im der da nicht gefridt hat abtragen/ vnd ist XII d. zu wanndel Auch wanndel geschiecht in wein dye ainer selben gepawt hat/ der ist der recht herr pessrer Sind es aber Kauff wein so gehorent Sy zu dem veldgericht Auch ob Kaufflew^ett ke^amen in daz aigen/ vnd wolten von aim kauffen welherlay daz we^ar/ vnd ob ainer da we^ar vnd entzug ims zu frum/ vnd ainen zu schaden/ der ist vmb daz wanndel/ ain gast vmb VI ß II d./ ain gesessner vmb LXXII d. Item ob Kaufflew^ett ka^emen/ vnd guet wu^erd verkaufft/ da angeben wu^erd ain phenning vnd ob sich ainer des abta^et/ an des andern willen/ der ist vmb daz wandel/ ain gast vmb VI ß II d./ ain gesessner vmb LXXII d. Auch wer vngerechtew mass geyt ann wein/ oder an getraid/ alls offt er das tuet/ XII d. zu wanndel/ vnd sol enem sein schaden abtragen Auch ob ainer dem andern sein dyern oder sein kchnecht enphro^embt/ der ist zu wanndel LXXII d./ vnd sol enem ein andrew dieren oder kchnecht wider stellen Item ob ainer vnsern halter slueg/ der ist zu wanndel nach yedem nachpawrn VI ß II d./ slueg in aber ain nachpawr/ der ist vmb XII d. zu wanndel Auch hab wir das recht/ das wir vns vnd Slicherstorffern/ vnd allen den dew dy recht mit vns habent/ ein halter sullen dingen zu Straytzesdorff var dem Amptman Item alles das wier dertaylen in dem rechten/ daz sprech wier bey vnsern trewn/ wer vns darin widertrib/ der ist vmb das wandel ain pawr vmb funff phunt phenning mag er der nicht gehaben/ so sol man im ain hant abslachen var dem rechten/ Aber ain phanntmessiger edler man/ vmb XXXII lib. d. zu wanndel Alle dy wanndel dy vargenant sind dye sind zu nemen nach genaden Auch ob yemant verswig vnd daz ta^et mit willen/ daz ers dy hawsgenassen nicht wissen liess/ in offner schrann/ vnd wolt sich lieben dem richter/ der ist aller der wanndel phlichtig/ der phlichtig we^arn (sic)/ wann wier etwas mit willen verswigen Aber wes wier vergessen an dem rechten recht tag/ daz sol wier melden in dem nachtaiding/ vnd sullen des vnengolten sein. Dye recht haben wier/ vnd alle dy zu vns geho^erent/ in das guet zu Straytzesdorff/ daz auch alle dy wandel/ dy da verbu^erhent dy hawsgenassen/ dy da geho^erent in das recht ze Straytzesdorff/ dy habent tag vntz in das taiding/ wann man in dann entzsagt/ so hat er sein recht ta^eg/ vntz in das nachtaiding/ Auch was man vns verpewtt Juden oder Christen/ daz sol man vns wissen lassen/ inner viertzechen tagen/ daz nicht drew pot wanndel dorauff genn Auch lieber gena^ediger herr/ ob wier ichtz hyeten vergessen/ daz wier nicht hyeten gemeldet an diser zedel/ das twe wier angeuer/ vnd ob ichtz an den tag ke^am hinfur daz wier nicht hyeten gemeldt/ daz wellen wir nach ewrn gnaden/ vnd ewrm veldrichter gern derkennen/ vnd zu wissen twnn/ in offner Schrann.

Source Fulltext: FAIGL, Herzogenburg (Wien 1886) S. 332-338