Wir Gorg von gotes gnaden Bischoff ze Passaw. Bekennen mit dem brief. Daz fu^er vns kam der Erwirdig vnser lieber in got Merttein der Schenkch Probst ze Herczogenwurkch vnsers Bistumbs vnd gab vns ze erkennen wie er redleich gekaufft hiet von Petern dem Hirslein von wenigen Rust vnd seinen erben den zehent gelegen in herczogenwurger veld, auf vier vnd zwainczig Jeuch a^ekkern der von vns vnd vnserm Gotzhaus ze Passaw lehen ist vnd des halben tail zehentz ligen Sibenzehn Jeuch zu Eben vnd zwai in dem Rumertal, vnd fu^enffe in Etretinger leitten als wir des mit briefen aigenlich erweist sein warden vnd bat vns mit vleysse daz wir Im vnd seinem obigen Gotzhaus den zehent geruchten ze aigen. Also haben wir durch sunder gunst vnd lieb willen die wir zu im vnd seinem obigen Gotzhaus haben im die genad getan, vnd haben im vnd seinem obigen Gotzhaus denselben zehent geaigent vnd aigen auch wissenleich in kraft dicz briefs. Mit vrkunt des briefs. Geben daselbs ze Herczogenwurkch an Sant Peter vnd Pauls tag der heiligen zwelfboten. Nach Christi gepu^erd in dem vierczehenhundertisten Iare.

Source Fulltext: FAIGL, Herzogenburg (Wien 1886) S. 353-353