Reuerendis in Christo patribus dominis et fratribus suis karissimis dominis Johanni dei gracia preposito Vlrico decano Totique Capitulo Canonicorum Regularium Ordinis sancti Augustini Monasterii Ecclesie beati Georii in Herczogenburga Pathauiensis diocesis Conradus dei gracia Abbas Johannes Prior Totusque Conuentus Monasterii Sancte Marie virginis in Formbach Ordinis Sancti Benedicti prefate diocesis patauiensis cum devotis oracionibus sinceram et fraternam in domino caritatem. Cum mentes et corda religiosorum Ecclesie federe singularis dileccionis adunate vigili cura semper ad hoc intendere debeant ut qui nexu carnalis amoris hie fideliter coniunguntur solutis eciam corporibus in spiritu feliciter congregentur Ad quod utique fiendum, nichil adeo credimus profuturum, quam ut fusis pro inuicem piis obsecracionibus placabilem sibi reddant supernum Judicem, qui in ira misericordie recordatur. Si enim secundum statum exterioris hominis qui sibimet quodammodo parare potest aminiculum in karitate jubemur documentis apostolicis Alterutrum onera supportare videtur oportunius et multo saluti congruencius ut interior status noster qui disiunctus a corpore nichil sibi prodesse poterit bonorum tamen operum exerciciis et caritatis oracionumque suffragiis adiuuetur. Nos igitur iuxta salubrem vestri desiderii conceptum ad vnionem nostre fraternitatis gratanter et gaudenti animo vos recipientes decreuimus Vobis omnibus et singulis cunctisque vestris successoribus tam in vita quam in morte plenum dare participium omnium piarum accionum que per nos in ecclesia nostra ex nunc et in antea operata (sic) fuerint nostri clemencia saluatoris Adicientes nichilominus ut cum aliquis fratrum vestrorum vocante domino decesserit eiusdem nobis obitu nunciato commendabimus ipsius animam consuetis vigiliis et Missarum sollempniis fidelium redemptori nec non aliarum horarum Conuentualiorum (sic) et quibuslibet aliis diuinis contemplacionibus et ympnizacionibus imparte penitus et intoto Insuper volumus et statuimus presentibus firmiter et expresse pro nobis et nostris successoribus omnibus perpetue et eternaliter conseruando et cum obitus alicuius uel aliquorum premissorum confratrum nostrorum intimatus fuerit tunc quilibet sine omni postergacione eiusdem defuncti uel eorundem defunctorum taliter celebret pro salute animabus (sic) ipsorum et ipsos inscribendo nostris libris annualibus ac diem Anniuersarium seu Anniuersarios annuatim peragendo sicut pro nostris fratribus fieri solet omnimode Eciam diaconi Subdiaconi Accoliti nostre professionis legent in priuato vigilias maiores in salute animarum predictarum. In cuius rei testimonium vobis has nostras literas damus nostrorum Sigillorum munimine roboratas. Datum et actum in nostro Monasteriique nostri habitaculo Sub Anno domini Millesimo Quadringentesimo tercio feria Secunda post diem Palmarum proxima.

Source Fulltext: FAIGL, Herzogenburg (Wien 1886) S. 353-354