ICH fridreich von Walsse Lanntmarschalch in O^esterreich Bekenn von der Stozz wegen di da gewesen sind zwischen dem Erwirdigen Geistleichen Herrn dem Brobst zu Herczogburg vnd dem Conuent daselbs ains tails vnd dem Erwirdigen Geistleichen Herrn dem Abpt ze Sewsennstain vnd dem Conuent daselbs dez andern von dez zehentz wegen so di egenanten Herrn von Herczogburg habent wellen haben von den von Sewsenstain von iren weynwachs wegenn di si habent ze Nusdorf pey Holennburg gelegen daz si payd tail darvmb Ir anwelt mit vollem gewalt an Irer stat habent her geschikcht der egenant Brobst von Herczogburg herrn vlreichen Techant daselbs vnd der egenant Abpt von Sewsenstain herrn Hannsen Pryor daselbs di sind hewt für mich komen vnd habent dieselben Ir stözz da vor mein vnd den herrn ze payderseytt aygenleich fürgelegt vnd ze erkennen geben vnd auch ir brief so sew ze payder seyt habent hörn lassen vnd dez do pey den herrn zu dem Rechten beliben. di habent in nach verhorung also ir payder fürlegung vnd ir payder brief zu dem Rechten erkannt seind der egenant her h an n s sprech wie daz si nÿe mer ze zehent haben geben denn von ainem dreyling einen ember wein vnd haben daz vnversprochenleich vil mer wenn ir Recht teg also herpracht vnd in solicher nücz vnd gwer Inne gehabt alz daz danne auch dieselben gwer ir brief bezeug vnd seind danne der egenant Techant da wider Sprech wie daz si daz ierleich gemelt vnd irn ganczen zehent geuodert haben alz in den ander lewt geben di daselbs weinga^erten haben Mugen si danne geweysen daz si daz vor meinen genedigen herrn den herczogen oder vor den Marschalhn di vor mein gewesen sind vor meinem lieben prueder herrn Ruedolfen von walsse Hofmaister oder vor dem von Dachsperg mit dem Rechten also getan haben dez schullen si geniessen Mugen si dez aber nicht geweysen so schullen sich di Sewsenstainer ir nucz vnd gwer halten. Mit vrkund dez briefs. Geben ze wyenn an Suntag nach sand Mertten tag Anno quarto.

Source Fulltext: FAIGL, Herzogenburg (Wien 1886) S. 358-359