Wir Iohanns von gotes gnaden Brobst sand Joring gotzhaws ze herczogenburchk vergehen offenleich mit dem brief allen den den er fu^erkumpt dy nu^e lebent oder hernach kunftig werdent das wir mit wolbedachtem mu^et Gnad getan habenn vnser holden ainem Merten ze Duerrenpach vnd Angnesen seinerr hausfrawen vnd Irenn paiden erben an ainem vnserem behawsten gut gelegen daselbs ze Du^errenpach das wir inn vnd iren paiden Erben zw freym purchrecht geben haben mit allen denn rechten als purchrechts recht ist In dem Lannde ze O^esterreich, dauon man vns alle jar ierleich diennen schol auf sand Michls tag zw Rechtem purchrecht Von erst von ainer wisen gelegen daselbs ze Du^errenpach obberhalb des prunns vnd von ainem akker gelegen daselbs acht phennig vnd von ainem garten daselbs der ee behawstz gu^et gewesen ist vnd von ainem gertlein gelegen daselbs pey der rynn zwen phennig vnd awer von ainem akker gelegen daselbs ze Durrenpach an dem Swaigpu^echll vier phennig Also beschaidenleich das der vorgenant Mertt vnd Angnes sein hawsfraw vnd ir baider erben mit dem vorgenanten purchrecht allen iren frumen schaffen mugen mit uerseczen mit uerchauffen schaffen machen vnd geben wem sew wellent an alle Irrung vnd durich pesser sieherhait willen So gewen wir dem vorgenanten Mertten vnd Angnesen seiner hawsfrawen vnd irenn paiden erben denn brief versigilt mit vnserm anhangundem Insigill vnd des ist zewg der Erber Jorig der Parssenprunner dy zeit Burggraff ze wolfstain mit seinem anhangundem Insigill denn wir vorgenanter Johanns Brobst ze herczogenburch vleizzichleich darumb gepeten haben Im vnd sein erben an Schaden. Geben nach christi gepurd virczehen hundert Iar darnach inn dem fumften Iar des nachsten Samstags nach Sand philipps vnd sand Iacobs tag der heiling zwelifpoten.

Source Fulltext: FAIGL, Herzogenburg (Wien 1886) S. 359-360