ICH Leb Goczenstorffer dye zeyt purkgraff awf dem Haws ze Nusdorff vnd ich Angnes sein hausfraw vnd mit vns all vnsere erben wir vergehen vnd tuen chund offenbar mit dem prieff allen den dye in sechent horent vnd lesent das wir . . . recht vnd redleych haben ze chawffen geben Stephlein dem pair vnd frawn elspeten seyner hawsfrawn vnd allen irn payder erben vnser haws gelegen ze Nusdorff ze nachst pey der padstubn do von man ierleych dint an Sand Michhelstag vier wyenner phennig awf Sand Johanns alter vnd ist ze lechen von eym jesleychen pharrer da selbs vnd ayn garten gelegen pey dem obgenanten haws der do ze lechen ist von eym jesleychen purkgraffen oder wer des hawzz gewaltig ist da von man jerleych dint an Sand Michhelstag Acht vnd czwaynczk phennig In das hawz ze Nusdorff vnd dint awch nicht mer Also haben wir das obgenant haws vnd den garten ze chawffen geben Stephlein dem payr frawn elspeten seiner hawsfrawn vnd all irn paydn erben vmb acht phunt wyenner phennig vnd vmb ayn guldein der wir von in gancz vnd gar awzgericht vnd beczalt sein zu rechten te^agen an all sche\aden Vnd schullen sew hinfür mit dem selbigen haws vnd garten allen iern frvm schaffen nyessen vnd nuczen verchawffen verseczen schaffen machen geben wem sy wellent vnd alles damit tuen vnd handeln das in aller pest fugt vnd wolgeuelt an allew irrung vnd hindernuzz Vnd seyn awch wir obgenanten Ich Leb Goczensdorffer dye zeyt phleger awf dem hawz ze Nusdorff vnd ich Angnes seyn hawsfraw mit sampt all vnsern erben vnuerschaydenlaych des vorgenanten hawsz vnd garten recht gewer vnd scherm für all ansprach. . . . Vnd das der chawf fu^erbas stet vnd vnczebrochen beleyb So gib ich leb goczensdorffer fu^er mich vnd all meyn erben Stephleyn dem payr vnd frawn elspeten seyner hawsfrawn vnd allen irn payder erben den offen prieff versigilten mit meynem anhangunden Insigel vnd durich pesser sieherhayt willen haben wir awch vleyzzleych gepeten den erberen Hansen an dem Newnhoff das er der sach zewg ist mit seynem anhangunden Insigel im vnd sein erben an schaden vnd das ist geschechen so man zalt nach christi gepurd vierczehenhundert jar vnd in dem vierczehenten jar an Sand erhartz tag des heyligen pischolff.

Source Fulltext: FAIGL, Herzogenburg (Wien 1886) S. 370-371