IN Christo Ihesu Sibi dilectis. Reuerendo in Christo patri ac domino domino Johanni Parsenbrunner Preposito Monasterii Sancti Georgii In herczogenburg. Vniuersisque et singulis suis capitularibus et dominis Ordinis beati Augustini prefati collegii. ffrater heinricus Grefenberger humilis Prior prouincialis Allamanie superioris Ordinis fratrum beate Marie dei genitricis de monte Carmeli. Salutem et per oracionum suffragia regna celestia feliciter promereri. Celestis altitudo consilii sic suorum corda fidelium inflammando diuinitus nouit affectus dirigere ut ea que suo aspectui fuerint magis grata faciat instancius postulare. Sane cum non sine radio superni luminis mencium vestrarum aciem illustrantis multiplici operis exhibicione sepius eedem vestre venerande paternitates euidenter ostenderint ad nostrum prelibatum ordinem habere specialem deuocionem. Pretextu gloriose dei genitricis ac vestre deuocionis affectum diligencius attendentes et in domino commendantes. Quantum cum deo possumus reuerenciis vestris vicem cupimus refundere salutarem. Sperantes vobis fore grata pariter et accepta beneficia que per nos et fratres nobis commissos misericorditer operari dignabitur clemencia saluatoris. Licet indigni confisi tamen de eiusdem saluatoris dei omni potentis misericordia et gracia. Omnium missarum oracionum Jejuniorum vigiliarum predicacionum Abstinenciarum disciplinarum laborum ceterorumque bonorum omnium perpetuis temporibus tenore presencium vobis concedimus participacionem tam in vita quam post mortem. Addicientes nichilominus et de gracia speciali vobis concedentes ut cum obituum vestrorum in nostro prouinciali capitulo memoria fuerit recitata. Idem pro uobis Omnibus fiet et singulis quoad vniuersa et singula quod pro fratribus defunctis nostri ordinis communiter ibidem fieri est consuetum. In cuius rei testimonium Sigillum nostri prouincialatus officii presentibus est appensum. Datum in nostro conuentu Wiennensi. Anno Millesimo CCCC.XVII. Dominica die infra octauas Corporis Christi.

Source Fulltext: FAIGL, Herzogenburg (Wien 1886) S. 382-383