ICH Engelschalich Staleker Ich Margred sein hausfraw vnd vnser paider erben wekennen offenleich mit dem gegenburtigen prief daz wir mit guetem willen recht vnd redleich gemacht haben der kirhen zu vnser frawn in dem pirichech zu Salipulka den weingarten den ich vorgenanter Engelschalich gechauft hab vnd weczalt mit meinem vetern hern virgili charherren ze herczogenburg vnd di zeit pharrer zu Salipulka von dem erbern vnd frumen man Giligen dem koppen vnd leit ze waiczendorf in den Seczen vnd ist genant der Vnger vnd ist ze purchrecht von dem edlen herren hern Otten von Meyssaw dem er dient jerleich an sand Michels tag XV wyenner phennig vnd VI tayding phennig zu den te\agen vnd man ander tayding phennig doselbs dint den selben vorgenanten weingarten hab ich mit willen meiner vorgenanten hausfrawn vnd meiner erben vermacht vnd geben dem Gotshaws ze herczogenburg in soliher weschaidenhait daz ich mit vrlaub vnd gunst meines herren dem prabst vnd dem ganczen Conuent den vorbenanten weingarten inne schol haben vnd nuczen mein lebteg vnverkumert vnd vngeuerlich weder mit verseczen oder mit verchauffen vnd in guetem paw haben Wenn aber ich vorbenanter Engelschalich mit dem tod abgee so schol der vorbenant weingarten ledig vnd an zuespruch sein von meiner hausfrawn vnd allen meinen erben vnd weleiben pey dem vorbenanten Gotshaws zu Salipulka zu trost vnd selgeret vnsern vordem vnd zu lob got vnd der heiligen Junkfrawn marie vnd meinem vetern hern virgili vnd mir zu einer ewigen gedechtnuss Vnd daz daz also sta^et vnd vnczebrochen weleib darvber zu einem warn vrkund gib Ich vorgenanter Engelschalich der Staleker dem Gotshaws ze herczogenburg den gegenbu^ertigen prief vnd ist auch der handl vnd das gemecht geschehen mit einer gewissen kundschaft vnd mit stiffter vnd sto^erer handen des frumen vnd weschaiden Andres des Swanz vnd ist gemaindleich genant Clement di zeit richter ze Waizendorf des obgenanten edlen herren hern Otten von Meyssaw vnd seid wir ped Engelschalich vnd Andre nicht aigen Insigl haben So haben wir vleizzich gepeten di frumen vnd weschaiden man ped Hannsen von Pergaw mitpurger zu Pulka vnd Stephann waliher di zeit richter ze Egenburg daz sew der sach geczeugen sind mit iren anhangunden Insigeln in vnd irn erben an schadn. Geben an sand Bonifacii tag nach christi gepurd XIIII hundert Iar darnach in dem XXI jar.

Source Fulltext: FAIGL, Herzogenburg (Wien 1886) S. 388-389