Reuerendis in Christo patribus dominis suis et confratribus sincerissime dilectis. Domino . . . permissione diuina Preposito . .. Decano totique Conuentui ecclesie in herczogenburg Patauiensis dyocesis Hainricus Prepositus eadem permissione diuina Leonhardus Decanus totusque Conuentus ecclesie sancte Marie Nouecellensis Brixinensis diocesis cum deuotis oracionibus sinceram et fraternam in Domino caritatem. Pensantibus nobis et animo solliciter reuoluentibus quod vita hominum velud umbra velociter transeat sitque velud nauis cuius vestigium in aquis fluctuantibus non cognoscitur et tanquam auis aera transuoJans cuius itineris argumentum omnimode ignoratur ita ut homo iam floridus ac amenus in ictu oculi velud lanugo que flatu venti tollitur et tanquam fumus diffusus in aere quasi in nichilum redigatur, nec tunc sciri possit quis nostrum dignus sit odio uel amore. Visum fuit nobis super omnia expedire ut viri spirituales qui ea solum querere debent que sursum sunt nonque super terram decurrentia vite sue tempora sic preordinent sic prevideant ut labore suo transitorio quietem perpetuam valeant emercari. Ad quod utique fiendum nichil adeo credimus profuturum quam ut fusis pro inuicem piis obsecracionibus placabilem sibi reddant supernum judicem qui in ira misericordie recordatur. Si enim secundum statum exterioris hominis qui sibimet parare potest quodammodo amminiculum in caritate iubemur documentis apostolicis inuicem supportare videtur oportunius et saluti multo congruencius ut interior homo noster qui disiunctus a corpore nil sibi prodesse poterit bonorum operum exerciciis et caritatiuis oracionum suffragiis adiuuetur, et quia cura religiosorum ecclesie federe singularis dileccionis adunate semper ad hoc intendere debet animo vigilanti vt qui nexu carnalis amoris hic fideliter coniunguntur solutis eciam corporibus in spiritu feliciter congregentur Nos igitur nostri et successorum nostrorum nomine vestre ecclesie professis fratribus viuis ac mortuis presentibus et futuris confraternitatem et communionem plenamque participacionem omnium bonorum que per nostram fuerint ecclesiam in Missarum celebracionibus horarum Canonicarum sollempnisacionibus oracionibus predicacionibus jeiuniis vigiliis hospitalitatibus elemosinis aliisque quibuscunque bonis operibus in Domino conferimus in animarum vestrarum remedium salutare, subscripta nimirum aminicula adicientes in temporalium adiuuamenta videlicet quod si quemcunque ex uobis nomine vestri malicia temporis occasione licita, sew necessitate qualibet com pellente cum vestris literis premissarum causarum euidenciam continentibus ad nostrum Monasterium contingeret aduenire, Nos eundem tanquam unum ex nobis cuius gradu fungitur in victu vestitu consolacionibus quibuslibet per annum uel amplius debebimus conseruare et obeunti intra Monasterium similes nobis exequias in morte in egritudine curam in utroque officiositatem debitam iuxta nostri ordinis et Monasterii conswetudinem tenebimur exhibere. Cum vero obitus cuiuspiam ex uobis intimatus nobis fuerit nos exequias ipsius absentis velud presentis cum Missarum et vigiliarum sollempniis ceterisque debitis et conswetis fideliter exequemur. Insuper dies deposicionis sue nostris libris annualibus erit inscribendus et apud nos annis singulis ut pro nostris Canonicis solet fieri in omnibus fideliter peragendus. In quorum omnium euidentem memoriam presentes literas vobis transmittimus sigillorum nostrorum prenominatorum prepositi et Conuentus munimine roboratas. Datum in Monasterio Sancte Marie Nouecellensis vicesima sexta die mensis Maji Anno Domini Millesimo Quadringentesimo vicesimo primo.

Source Fulltext: FAIGL, Herzogenburg (Wien 1886) S. 389-391