Georgius dei et apostolice Sedis gracia Episcopus Patauiensis. Alme Strigoniensis Ecclesie Administrator, nec non Aule Romane Regie Maiestatis Cancellarius supremus, Vniuersis et singulis sancte matris ecclesie filiis presentes inspecturis Salutem in domino sempiternam. Cupientes Christi fideles indulgenciarum largicionibus et peccatorum remissionibus ad zelum deuocionis et pietatis, quibus diuine reddantur apciores gracie feruencius incitare, Nos omnibus vere penitentibus et confessis, qui ante Altare in honore omnium sanctorum situm in medio ecclesie Monasterii in Herczogenburg nostre diocesis consecratum et dotatum, deuote oracionem dominicam cum angelica salutacione, flexis genibus dixerint, et in festiuitatibus infrascriptis videlicet Natiuitatis Domini, Pasce, Ascensionis, pentecostes, corporis christi, omnibus festiuitatibus gloriosissime Dei genitricis virginis Marie ac omnium Apostolorum et dicto festo omnium sanctorum nec non dedicacionis dicti Altaris causa deuocionis uisitauerint, aut qui ad luminaria manus porrexerint adiutrices de omnipotentis Dei misericordia et beatorum Petri et Pauli Apostolorum ejus confisi suffragiis Quadraginta dies Indulgenciarum misericorditer in Domino auctoritate nostra elargimur perpetuis temporibus duraturis (sic). Harum sub appensione Sigilli nostri testimonio literarum. Datum in Ciuitate nostra Mawttam XXVI die Mensis Maji Anno Domini Millesimo Quadringentesimo vigesimo secundo.

Source Fulltext: FAIGL, Herzogenburg (Wien 1886) S. 395