ICH Peter Mulner gesessen pey herczogenburg nyderhalb des Perner Mulhoff auf der Traisem ich Elzzpet sein hawsfraw wir vergehen fu^er vns vnd alle vnser eriben vnd miteriben vnd tun chund offenleich mit dem wrief allen lewten gegenburtigen vnd chunftigen das wier . . . recht vnd redleich verchaufft haben vnser Mul halben gelegen pey herczogenburg zu nachst nyderhalb des Pern'er Mul vnd ain schachen pawm halben auch gelegen zwischen des Perner Mul vnd der nyderen Mul mit allen eren nuczen vnd rechten als sew dan von alter herchomen sind douon man dan ierleich dint dem erbierdigen geistleichen herrn probst Johannsen zu herczogenburg vnd all sein nachchomen ain phunt wienner phennig halbs zu sand Michelstag vnd halbs zu sand Gorigentag zu purkrecht vnd von dem obgenanten schachen pawm davon man auch ierleich dint dem obgenanten geistleichen herren oder seim Nach chomen an sand Gorigentag ain helbling zu purkchrecht vnd als nicht mer vnd haben sew zu chaufen geben dem beschaiden fridreichen in der Hueb von Etterding vnd elsspeten seiner hawsfrawn vnd ir paider eriben vmb newnthalbs vnd dreisig phunt wienner phennig der wier gancz vnd gar ausgericht vnd gebert sein an schaden darumb sullen vnd mugen Sy die vorgenanten gueter mit ir zugehorung von vns nwn vnd vnseren eriben vnd mit eriben hinfürbas ledikgleichen vnd freileichen Inn gehaben nuczen vnd nyssen vnd all iren frumen vnd nucz damit schaffen mit versetzen mit verchauffen schaffen geben machen wem sy wellen wie Inn das aller pest chumpt vnd wol fuegt an menikchleich irrung vnd widerred. Wier sein auch der obgenanten gueter mit ir zugehorung ir rechter geber fu^erstand vnd scherem fu^er all ansprach. . . . Vnd zu ainer woren vrchund gib ich obgenanter Peter Mulner vnd elzzpet sein hawsfraw vnd all vnser paider eriben vnd miteriben dem obgenanten fridreichen in der Hueb von Etterding, vnd elzzpeten seiner hawsfrawn vnd iren paiden eriben den brief besigelt mit gruntherren Insigel des erbirdigen geistleichen herren hern Johannsen Brobst zu herczogenburg anhangundem Insigel darczu haben wier vleizzig gepeten den erberen Ekcharten den pellanter mitpurger zu herczogenpurg das er der sach zeug ist mit seim anhangundem Insigel Im vnd all sein eriben an schaden. vnder des Sigel wier vns verpinden mit vnseren trewn alles das stet zu haben vnd volfueren das oben an dem brief geschriben stet. Der brief ist geben nach Christes gepurd vierczehen hundert Iar darnach in dem czway vnd zwainczigistem Iar an sand luczein tag der heyligen Junkchfrawn et cetera.

Source Fulltext: FAIGL, Herzogenburg (Wien 1886) S. 397-398