Martinus episcopus seruus seruorum dei. Dilecto filio. Abbati Monasterii Melicensis Patauiensis diocesis Salutem et apostolicam benedictionem. Sedes apostolica pia mater recurrentibus ad eam cum humilitate filiis post excessum libenter se propitiam exhibet et benignam. Exhibita siquidem nobis nuper pro parte dilecti filii Virgilii de Salzeburga Canonici Monasterii sancti Georgii in Herczogenburg ordinis sancti Augustini Patauiensis diocesis petitio continebat quod cum olim quondam Johannes Feurschucz laicus instigante diabolo uxorem suam, sororem dilecti filii Iohannis Rewter armigeri dicte diocesis inhumaniter interfecisset, ipseque Johannes huiusmodi mortem uindicare satagens dictum interfectorem puniri facere uelle anelaret ac eundem Virgilium qui tunc quandam parrochialem ecclesiam prefato Monasterio unitam de licentia superioris sui regebat, ut duos suos familiares siue ministros armatos quos secum habebat ad assistendurn eidem armigero in periculis concedere uellet attentius rogasset, ipse Virgilius intentionis ipsius armigeri non ignarus prefatos eidem armigero concessit siue adiunxit familiares cum quibus et aliis clientulis dictus armiger ad locum habitationis ipsius homicide accedens illum inibi apprehendit et carceribus aliquandiu detinuit ac tandem procurauit et fecit ultimo supplicio puniri, ipse quoque Virgilius deinceps credens etiam id sibi licere nulla dispensatione preuia obtenta canonica missas et alia diuina officia non tamen in contemptum clauium per plures Annos celebrauit et immiscuit se eisdem, licet postmodum quorundam Jurisperitorum fretus consilio a celebratione missarum per aliquod tempus cessauerit prout cessat de presenti. Quare pro parte ipsius Virgilii nobis fuit humiliter supplicatum, ut sibi suoque statui super hoc oportune prouidere de benignitate apostolica dignaremur, Nos igitur qui salutem appetimus singulorum huiusmodi supplicationibus inclinati discretioni tue per apostolica scripta mandamus quatinus prefatum Virgilium ab excessibus ac reatu homicidii huiusmodi si hoc humiliter petierit absoluas auctoritate nostra hac uice duntaxat in forma ecclesie consueta, iniunctis inde sibi pro modo culpe salutari penitentia et aliis que de iure fuerint iniungenda, et nichilominus cum eodem Virgilio super irregularitate quam premissorum occasione etiam huiusmodi celebrando diuina uel immiscendo se illis ut prefertur contraxit, et si tibi uideatur, ac ex hoc illis in partibus scandalum non generetur super quo tuam conscientiam oneramus, etiam cum ipso quod in omnibus ordinibus deinceps ministrare libere et licite ualeat, dispenses, omnem preterea inhabilitatis et infamie maculam siue notam per ipsum premissorum occasione contractam aboleas auctoritate memorata. Datum Rome apud Sanctos apostolos VIII Id. Martii Pontificatus nostri Anno Octauo.

Source Fulltext: FAIGL, Herzogenburg (Wien 1886) S. 399-401