ICH Stephan Ryss von Inczestorff vnd Elspet sein hawsfraw vnd Margret vnd Anna seiner hawsfrawn chinder vnd ich liendel holdel von Inczestorff vnd ich vlreich holdl sein Bru^eder vnd ich hanns Garttner vnd Elspet sein hawsfraw vnd ich Veytt Gartner vnd Elspett ir swester Bekennen alle mit einander ainhelligkleich fu^er vns vnd fu^er alle vnser eriben vnd miteriben Vnd tun dar czwe kund offen leich mit dem brief allen den er fu^erkumpt gegenburtigen vnd kunffting das wir von dem Erwirdigen geistleichen herrn hern Johannsen Brobst sant Jorigen Gotshaws zw Herczogenburg vnd von dem ganczen Conuent daselbs In bestandes weiss vnd auf vnser leib westanden haben zway Jewch weingarten vnuerchawfft gelegen an dem perig ze Inczestorff niderthalb der alten Chunter Inn Weingarten genant der prayt akcher der In vnd irm Gotshawss ledig worden ist von Petern dem Muschen Rigl vnd liendlein dem Nwsser vnd iren eriben dye wir Nwn fu^erbaser In bestandes weiss Inhaben schullen nuczen vnd niessen Item von erst So hab ich obgenanter Stephan Ryss vnd Elsbett mein hawsfraw vnd Margret vnd Anna meiner hawsfrawn kinder ain halbs Jewch Item liendl Holdl vnd vlreich Holdl gepru^eder haben ain drytail aus aim Jewch Item Hanns Gartner vnd Elspett sein hawsfraw vnd Veytt Gartner sein bru^eder vnd Elspett Ir Swester haben ain halbs Jewch vnd zway drytaill aus aim Jewch In solher mass das wir dy vorgenanten zway Jewch weingarten pawleich vnd Stifftleich halden schullen mit guetem mittern paw Also weschaydenleich das wir dem vorgenanten Brobst vnd seim gotshaus alle Iar Jerleich davon dyenen vnd raichen schullen an all ir mue aus dem selbing weingarten den wir lesen schullen in ain press an zwain ta^egen nach einander an vnderlass vnd In dem drytten embmer wein aus dem selbing weingarten pey der press geben schullen, den sew vessen schullen in Ir vas Wir schullen auch den vorgenanten weingarten nicht lesen noch pey der press taylln es sey dann Ir anbalt vnd pott dabey gegenbu^ertig Wir schullen auch den Pressern vnd andern arbaytern Chost liecht vnd lan geben ausgenomen den tragern den wir von vnserm tayl lanen schullen vnd sew von dem iren Wir haben auch mit des vorgenanten Brobst guetleichen willen vreye wal den vorgenanten weingarten zw verseczen zw verchawffen vnd nicht anders wenn mit den rechten dew wir dar czwe haben aynem geleichen mann der dem vorgenanten Brobst vnd seim Gotzhaws dar zwe fuegleich sey vnd sol das geschechen mit seinem guetleichem willen vnd mit sein hannden Wir schullen auch den vorgenanten weingarten mit rechtem gueten paw halten mit mist mit Stekchen mit grueben vnrl mit anderm paw das dar czwe geho^ert Te^aten wir des nicht vnd das wir das mit den Nachpawrn oder andern pawlewten v^eberbeist wu^erden So soll man vns mit vnserm tayll most pey der press phenndten Dar zwe so schullen wir dannoch von allen vnsern Rechten geuallen sein recht als ob wir tad wern Auch ist ze merkchen wann das ist das der leczt leib vnder den vorgenanten dreyerlay leiben mit dem tad abgangen ist vnd nicht mer enist vnd ob er das erst paw in dem weingarten volbracht hiet So mag er dye nucz de Im zw seim tail desselbing Iars zwe stendt schaffen machen vnd geben wem er wil also das dem weingarten an dem andern paw vncz hinbider zw dem lesen nichts verczogen werd Vnd sol fu^erbaser der weingarten dem egemelten Brobst vnd seim Gotzhaws wider ledig vnd lass sein an allen krieg vnd widerred. Vnd des zw einer warn Vrkund so geben wir dem Egemelten Brobst vnd dem ganczen Conuent den offenn brief Besigilt (mit) der Erbern weysen Hannsen des Melkchaimer die zeit Richter zw Herczogenburg vnd lienharten des Schilher Burger vnd ainer des Rats zu Herczogenburg paider Anhangunden Insigiln dew wir mit vleiss paid dar vmb gebetten haben In paiden vnd irn eriben an schaden wenn wir die zeit selber aygens gegrabens Insigil nicht enhetten. Darhinder wir vns verpinden all obgeschriben mit vnsern trewn an aydes statt alles das war vnd ste^att zu haben das an dem brief geschriben stet. Geben nach vnsers Herrn Cristi gepurd Vierczehenhundert Iar dar nach in dem Newn vnd dreyssigkisten Iar an Mitichen nach sant Gilig tag.

Source Fulltext: FAIGL, Herzogenburg (Wien 1886) S. 443-445