ICH Wulfing Veyrtager zu Haiczendorff gesessen vergich fu^er mich vnd all mein erben vnd tun kunt offenleich mit dem prief Allen dew In sehent und horent oder lesent dy yecz lebent vnd hernach kunftig werdent von der zuespruch vnd Sto^ezz wegen So Ich ains tails vnd dy Erwirdigen geistleichen herrn ... her Iohanns Brobst des Gotzshaws zu Herczogenburg vnd der gancz Conuent daselbs des andern gehabt haben von zwayer Mess wegen So sew dann vor zeiten gelesen vnd ausgericht haben von Irer pharr zu Hayczendorff In Sand Georigen Kappellen dy da ligt In meins egenanten veyrtager hor zu Haiczendorff Nu pin Ich egenanter Wulfing veyrtager mit meinen nachsten frewntn mit den egenanten herrn dem Probst vnd dem ganczen Conuent des Gotzhaws zu Herczogburg mit einander aynig warden Also das sew nu fürbaser oder wer die pharr verbeset vnd vor vnfryd mugen Jerleich ain Mess mir vnd mein erben oder wer den benanten hof Innehat lesen vnd ausrichten sullen all wochen an dem Samstag in der vorgenanten Sand Georigen Kappelln von Irer pharr zu Haiczendorff ko^em aber ain veyrtag an den Selben Samstag So sullen sew dy Mess an ainem anderm tag derselben wochen lesen vnd ausrichten an alles vercziehen we^ar aber das sew der Ir pharrer oder wer dy pharr verbest dy Mess in ainer wochen nicht ausrichteten als dann vorgemeldet ist, So sullen sew mir oder mein erben oder dem der den hof Innhat In der nachstkunftigen wochen zwo Mess in der obgemelten Kappelln lesen vnd ausrichten. we^ar aber das sew oder wer dy pharr verbeset ain Moneyd oder lenger verczu^egen So sol vnd mag Ich mich egenanter veyrtager oder mein erben oder wer den hof dy czeit Innhat vns des dinst zu leubs vnd Respicz underwinden der vor zu der Mess gehort hat vnd wir mugen dy selben nucz So lang Inhaben zu nucz der selben Mess in Sand Georigen Kappelln vnd nicht vns selbs Incziehen als lang das das alles volpracht wyrdet das der Mess abgangen ist Auch habent sew vns verlobt das sew oder ain yeder verbeser an Sand Georigen tag vnd an dem tag So dy Kappelln geweicht ist warden vns ainen priester an den benanten tegen predigen sullen lassen In der selben Kappelln, Als das dann von alter herkomen ist Was aber an den benanten tegen oder aber an andern tegen opfer in derselben Sand Georigen Kappelln In dem Haws gelegen geophert auf den Altar wurd das sol ain pharrer der dy czeit da ist Innemen vnd aufheben vnd Ich mein erben oder wer den benanten hof Innhat nicht Ich vorgenanter Wulfing veyrtager oder wer den hof Innhat sol den priestern vnd den dy singen helfent vesper vnd Ampt an den selben tegen essen vnd trinkchen geben Darumb sullen wir Ich mein Erben oder wer den hof Innhat dy Sammung Innemen vnd das das alles so oben geschriben vnd gemeldet ist stett vnd vnczebrochen beleib daruber So gib Ich egenanter Wulf in g veyrtager für mich vnd für all mein erben vnd wer den hof nach vns Innhat den Erwirdigen geistreichen herrn . . . dem Probst vnd dem ganczcn Conuent vnd allen Irn Nachkomen des benanten Gotzhaws zu Herczogenburg zu ainer waren vrkund den brief Besigelten mit meines vorgenanten Wulfing des veyrtager Anhangunden Insigel vnd durch zeugnuss willen der sach hab Ich vleizzich gepeten den Edeln mein lieben frewnt Jorgen den Rauber zu Sitndorff, das er sein Innsigl auch zu bestettung der obgeschriben sach an den brief gehangen hat doch Im vnd sein erben an schaden Der brief ist geben zu Haiczendorff Nach Kristi gepurd vierczehenhundert Iar vnd darnach In dem vierczigkisten Iare An Suntag nach Gotzleichnams tag.

Source Fulltext: FAIGL, Herzogenburg (Wien 1886) S. 449-451