Ich Hainreich von Prunne tuen chvnt vnd vergich an disem prief allen den di nv lebent vnd hernach chunftich sint, daz mit gvnst vnd mit meiner chvn vrowen - vnd aller meiner erben nach meiner frevnt rat dem ersamen herren Perchtold dem Brobst vnd seiner Samnvnge dez gotshaus ze Newnburch mit gutem willen vnd vnbedwungenleich auf han gegeben allez daz Perchrecht, daz ich an des gotshauses pergen ze Newnburch iach mein lehen sein von demselben gotshaus, vnd daz mein vordern in lehens gewer pracht hieten vncz an mich, vnd han auch mich dez fürzicht getan also daz weder ich noch alle mein erben hernach chainen chrieg noch chain ansprache dar nach haben schullen vnd ist auch mein herre der Brobst vnd dev vorgenante Samnvng avichleich ledich ze geben daz perchrecht von dem weingarten, der da heizzet der paurt zu weidnich vnd auch von dem, der da Göler genant ist, die paid in dem vorgenanten perchrecht gelegen sint, vnd dar vmb habent si mir gegeben zehen phvnt phenning wienner mvnzze, der ich gar vnd genczleich gewert pin, vnd von den andern weingarten, di in dem selben perchrecht gelegen sint, sol man daz perchrecht dienen den zwain erbern mannen hern Wernharten dem Schiver vnd Jacoben dem forster, di daz selbe perchrecht dar nach, vnd ich ez auf gegab, als vorgeschriben ist, von dem vorgenanten hern Perchtold dem Brobst vnd von seiner Samnvnge ze rechten lehen emphangen habent, daz auch di selben zwen mann her Wernhart vnd Jacob, noch hernach in paider erben daz vor genant perchrecht icht geweiten mugen noch gemerern dem vorgenanten gotshaus ze schaden han ich an disen prief lazzen schreiben alle die weingarten, dar auf daz vor genant perchrecht leit, vnd dar zu alle di leute, di dieselben weingarten ze disen zeiten inne habent vnd daz perchrecht da von dienent. Daz ist dez ersten der Tölr von einem weingarten, haizzet der Plintendorfer, dez ist ein viertail, der dienet davon drev viertail weins. Darnach der Neczenwisch von einem weingarten haizzet dev eysnem phait, dez ist ein ieuch, dienet drey emmer weins. Darnach Christan von einem weingarten, der haizzet Göderl, dez ist ein halbes jeuch, dient anderthalben emmer. Darnach der Schün herre von einem weingarten haizzet der Plintendorfer, dez ist ein viertail, dienet drev viertail. Dar nach Eberhart der Stelzer von einem weingarten der leit an dem Stainhouffen, der ist ein halbs ieuch vnd dienet anderthalben emmer. Dar nach Ofmeye dev eniune von einem viertail an dem Stainhouffen drev viertail. Dar nach Wolfram der Schuster von einem viertail an dem Stainhouffen drev viertail. Dar nach der alt munnich von weidnich von einem halben jeuch daz haizzet der Spiegel anderthalben emmer. Dar nach Symon in der Prvtstermgazzen von einem achttail an der langengazzen ein viertail. Dar nach der manger von einem halben Jeuch an der langengazzen anderthalben emmer. Dar nach leubleins des Smides svn von einem halben ieuch in dem weingraben anderthalben emmer. Dar nach Vlreich der amman von einem weingarten haizzet Gerl dez ist ein viertail dienet drev viertail. Dar nach fridreich heczman dient von einem viertail drev viertail. Dar nach Chvnrat von Pergowe von einem viertail an der langengazzen drev viertail. Dar nach Gotfrit des Cholbechen svn von einem halben ieuch haizzet der Plintendorfer anderthalben emmer. Dar nach Hainreich der Pader von einem halben ieuch haizzet dev Rose anderthalben emmer. dar nach Rudwein vnd Sigloch di zwen prüder von zwein ieuchen an der langengazzen funf emmer, dar nach di herren von willehering von einem halben ieuch in dem Chochgraben anderthalben emmer. dar nach der herre von zelking von einem weingarten sybenthalben emmer. Daz disev red, di vorgeschriben ist, furbaz also stet beleib vnd fvrbaz vnzeprochen, dar vber ze einer sicherhait gib ich dem vorgenanten gotshaus disen prief mit meinem Insigel versigelt vnd durch pezzer sicherhait han ich gebeten den ersamen herrn hern Hadmar von Svnneberch, daz er sein insigel zu dem meinen an disen prief hat geleit. Diser sache sint geczeuge die ersamen herrn, her Stephan||
von Meyssowe, her Ott von zelking, her Rapot vnd her Haidenreich die zwen prueder von Gors, dar nach her Ortolf von Newndorf, her Rueger von Steucz, her Vlreich von Riczendorf, her herman ymian, dar nach Gervnch hern Choln svn, Engeldiech von Maurbach, Dietrich der Schiver, Johannes von Nuzdorf, herman von freising, Chvnrat, Rudwein, Gvndolt, Wisent von Egenburch, vnd ander frumen leut genuech. Diser prief ist gegeben ze Newnburch da man zalt von Christes gepurtte dreuczehen hvndert iar dar nach in dem achten iar an sant Johannis tag ze Svnnesventen.

Source Fulltext: ZEIBIG, Klosterneuburg (=FRA II/10, Wien 1857) S. 113-115