Ich Johannes Hern Otten sun des Schenchen, den Got genad, Vergich vnd tuen chunt - - daz nach ersamer Leut rat vnd ovcmeiner frevnde, Di ez also beschaiden habent zwischen den Ersamen Gotshovs vnser frowen ze Nevnburch vnd Mir aller Chriech verebent vnd verslihtet ist, also daz Ich - - dem ersamen Herren Brobst Berhtolden, vnd seinen Gotshovs - - auf han gegeben meinen hof ze Ruekersdorf - - vnd han daz allez ze Leibgedinge herwider emphangen von dem vorgenanten Brobst Berhtolden vnd von dem Gotshovs also: Daz derselbe hof vnd Swaz dar zue gehoret, als ez e genennet ist, dem vorgenanten Gotshovs mit mein aines tod ledich wirt - - vnd diser schidunge ze einen Vrchvnde schol ich alle J, dy weil ich Leb, dem Gotshovs ze sand Gilgen tag davon dienen zehen metzen Chornes - - Dar vber ze einer sicherhait gib ich de Gotshovs disen brief mit meinem insigel versigelt vnd dvrch pezzer Vrchvnde han ich gebeten di ersamen Ritter, Hern Chvnraden den Huebmaister, Hern Vlrich von dem Gereut vnd Hern Vlrich des Hofmaisters svn, daz sie irer insigel zu dem meinem an disen brief habent gehangen. Diser red sind gezeuge di ersamen herren Herr Eberhart, der Techent von Nevnburch, Her Jacob der Pharrer von der Heiligenstat, Her Stephan der Spitaler, Her Thomas vnd Her Wernher von Schevrnberch dj Priester, Dar nach Her Ortolf von Nevndorf, her Wernhart der Schiver vnd Her Herman Ymian dj Ritter. Darnach Gervnch hern Choln svn, Engeldiech vnd Otto, dj zwen Bruedter von Maurbach, Herman von Freising, Chvnrat, Rudwein, Wisent von Egenburch, Gvndolt vnd ander frvm Leut genuech. Diser brief ist gegeben ze Wienne - - Dreutzehen hvndert darnach in dem ahten iar an dem nahsten mantag nach sand Merteins tag.

Source Fulltext: ZEIBIG, Klosterneuburg (=FRA II/10, Wien 1857) S. 115