Ich Leutold von Ekendorf mit samt meiner Chvn frowen Kathrein, vnd ich Chvnrat von Porsenprvne vnd mein Chvn frow Christein wir veriehen - Daz wir - dem Ersamen Herren Brobst Perhtolden vnd der Samnvnge ze Nevnburch ze chovffen haben gegeben Dreu phunt phenninch gülte ovf ainer Padstuben, di ze Otachringe gelegen ist, vnd aber daselbe Sehtzich phenninge gulte, di man dient von zwain hofsteten, - daz wir allez gehabt haben ze Purchrecht von demselben Gotshovs, vmb achtzehn phvnt phenninge Wienner munzze, der wir gar vnd ganzleich gewert vnd verrichtet sein. - - Dar zue schulle Herman der Pader vnd sein Chvn frowe Guet, oder swer si nach in besitzet dj vorgenanten Padstuben mit der vmbesezzen wizzen alle Jar pezzern vnd fur ziehen mit sechs schillinge phenninge, di si dar ovf verbowen schullen. Swelches iares aber si daz versovment, so ist dev selbe Padstuben ledich dem vorgenanten Gotshovs an allen irresal. Vber disen chovf, vnd vber disen scherm ze sicherhait geben wir, Ich Leutold von Ekendorf vnd ich Chvnrad von Porsenprvne dem vorgenanten Gotshaus disen brief mit vnsern insigeln versigelt. Dis sint des gezeuge: Herr Wernhart der Schiver, Her Wolfgang von owe, Durinch von Mevrlinge, Fridreich der Hutstoch, Johannes von Nuzdorf, Symon von Pellendorf, Herman von freysinge, Chvnrat, Rudwein, Gundolt der Vorster, Engeldiech von Movrbach, Wisent von Egenburch, Jacob der Chelner, Peter freisinger, Gotfried der Cholbeche vnd ander frum Leut genuech, den dis sache wol chunt vnd gewizzen ist. Dieser brief ist gegeben ze Neunburch - - Dreutzehen hundeiar darnach in dem fumfzehendem Jar an sand Gregorien tag in der vasten.

Source Fulltext: ZEIBIG, Klosterneuburg (=FRA II/10, Wien 1857) S. 147-148