Viris honorabilibus, in Christo dilectis Dominis, Preposito, Decano Ceterisque omnibus Canonicis Ecclesie Newnburgensis frater Alexander Prior generalis ordinis heremitarum sancti Augustini salutem et augmentum celestium graciarum. Gloriosus Deus, vt in suis clarius eluceret, dilectionis mutue, que sola celestis vite representat ymaginem, ipsos voluit insigniis enitere, quo alter alterius honera portando, Lex eius immaculata convertens animas, fideliter observatur, et currentes in stadio ad superne glorie bravium feliciter disponuntur. Ipsa igitur Karitas, que deus est, vos atque vestra nostre Religioni, prout fratrum nostrorum relacione didicimus, tam pie liberaliterque communicans apud nos debita recognicione pensanda, vestre devocioni donis spiritualibus nos cogit occurrere, vt, si quid eius perfectioni deesse timet, plurium suffragiis suppleatur. Proinde vos omnes, et singulos tam presentes, quam futuros ad cnfraternitatem nostram recipimus in morte pariter et in vita, tenore presencium, et participes esse volumus omnium Missarum, oracionum, predicacionum Jejuniorum, vigiliarum, laborum ceterorumque bonorum, que per fratres nostros in vniverso mundo effecerit clemencia salvatoris. In instanti nostro Capitulo fideliter statuentes, vt cum obitus alicuius vestrum nostris Capitulis innotuerit, recommendaciones cum suffragiis pro illo, vel illis fiant, que pro nostris sunt confratribus institute. In cuius concessionis testimonium et robur Sigillum Confraternitatis nostri ordinis presentibus duximus apponendum. Datum Arymini in nostro generali capitulo ibidem celebrato Anno Domini M° CCC° XVIII° in festo Pentecostes.

Source Fulltext: ZEIBIG, Klosterneuburg (=FRA II/10, Wien 1857) S. 162-163