Ich Herman der Sirfeier, Purger ze Wienn vnd Ich Alhait, sein hausvrow wir veriehen - Daz der Erber Herre Probst Stephan vnd her Perchtolt der Techent, vnd die gemain dez Conventes vnser vrown Gotshaus ze Newnburch - hin geben vnd verchauft haben vns vnd vnsern erben ainen irr weingarten, des fvmf viertail sind, vnd haizzet zink vnd leit ze Chalnperge ze nechst der Pevnt, vnd gehört in die Probstey vmb dritthalb hundert march silbers, ze zwen vnd sibenczig grozzer Pehemischer phenning fu^er ein iegleich march, Also beschaidenleich, Daz wir vnd vnser erben alle die zeit, vnd wir si dez egenanten Gutes nicht gewert haben, So suln wir in vnd i\erm Gotshaus von den vorgenanten weingarten alle jar zu drin zeiten dienen fvmfczich phunt phennninge wienner mu^enzze, zehen vnd fvmf Schillinge phenninge vnd Sechczehen phunt an sant Michelstag, vnd zehen vnd fvmf schillinge vnd Sechzehen phunt ze weihennachten, vnd zehen vnd fvmf schillinge vnd Sechczehen phunt an sant Jorigentage, vnd swelhes tages wir den vorgenanten dienst ze den egenanten drin zeiten versiczen, vnd in ze rechter zeit nicht geben, so suln si in ze hant darnach auf vnsern schaden nemen ze Juden oder ze Christen. Wir suln auch vnd vnser erben In vnd irm Gotshaus alle Iar in dem lesen, swelhes tages wir den egenanten weingarten lesen wellen, fv\er zehent vnd fv\er perchrecht geben vnd dienen sieben vierdunge silbers, ie zwen vnd Siebenczich grozzer Pehemischer phenninge fur dev march. - Vnd suln auch wir vnd vnser erben vrei wal haben, den vorgenanten dienst abzelO^esen vnd ze chaufen, wann wir daz geenden mugen, vnd swelhes iars daz an vnsern staten ist, so suln wir dez selben diensts fumf vnd zwanzich phunt mit ein ander ablO^esen vnd chaufen ein iegleich phunt vmb fumf march silbers immer zwen vnd Siebenczich grozzer Pehemischer phenninge fur die march, vnd sullen wir si dez gutes in dem selben iar zwischen weihennachten vnd dem vaschang wern - - Diser sache sind geczeuge: her Jans von Syrndorf, Christan der Sluzzler, her Hartman von holabrunne, Maister Nicla der pharrer ze hO^eflein, Leupolt von Eslarn - Der brief ist gegeben ze Newnburch - Drevzehen hundert Jar darnach in dem Sechs vnd zwainczgisten Jar an dem nechsten vreytage vor dem Svnnwent tage.

Source Fulltext: ZEIBIG, Klosterneuburg (=FRA II/10, Wien 1857) S. 222-223