Ich Vlreich der Schench, Pu^erger ze Pazzawe vnd ich Anna sein Hausvrawe wir veriehen - Daz wir - mit vnsers Pericherren hant hern Symons des erbern Ritter recht vnd redlich verchauft haben vnsern weingarten, den wir gehabt haben ze Newnburch, Leit an der Challeiten ze nechst Gerunges des stosels weingarten, vnd ist ain halbz Jeuch, ist auch vnser recht Chauf gut gewesen, dem erbern Herren hern Johannes dem Pharrer datz sande Mertein ze Neunburch, ist auch gewidemt auf vnser vrowen alter in demselben Goteshaus vmb dreu vnd achtzig phunt wienner phenning, der wir gar vnd gentzleich von in gewert sein. - Des geben wir dem oftgenanten goteshaus vnd dem Pfarrer disen prief zv\e ainen gezeug diser Wandlung versigelten mit vnserm insigel, vnd auch versigelt mit vnsers Pericherrn insigel, Hern Symons, mit des hanten deu Wandlung alleu geschehen ist. Des sint gezeug di erbern Ritter, her Gerunch der Chol, her Dieterich der schiver, her Christan der sluzzeler, Chunrat der smu^eckenphenning, Leupolt von Awe, Dieterich der Retzzer, Herman der sreiber - Der brief ist geben - dreuzehen hundert Jar vnd in dem fu^emf vnd dreizzigisten Jar zv Mitter Vasten.

Source Fulltext: ZEIBIG, Klosterneuburg (=FRA II/10, Wien 1857) S. 254-255