Ich Vlreich ze den zeiten Pharrer dacz Czwentendorf, vnd Gerunch vnd Chunrat mein prueder vnd vnser erben wir veriehen, - daz wir von vnserm weingarten, der da haizzet der Ger, vnd den wir gechauft haben recht vnd redleich von Nyclan von Narczendorf vnd vrown Margreten, seiner hausvrown zehent vnd anderthalben Emmer perchrechts dem Gotshaus ze Newenburch an alle widerred dienen schullen vnd verrichten. Wir sullen auch den selben weingarten nindert geben noch verschafhen auf ChlO^ester, noch auf GotshO^evser, da van daz Gotshaus ze Newnburch seinen zehent oder perchrecht auf demselben weingarten verliesen mO^echte. Wer aber daz vns notdurft, oder ander sach, wie die genant sint, darzu bedwungen, daz wir vnd vnser erben den selben weingarten verwandeln oder verchauffen wolten, Dez schulle wir vollen gewalt haben ze wu^erichen vnd ze chauffen geben den, die vns aller maist dar vmb gebent, vnd auch diu dem Gotshaus ze Newenburch vmb zehent vnd vmb perchrecht gewis sint. Daz lub wir ze laisten pey vnseren trewen an allez gever, vnd mit vrchund dicz priefes versigelt mit mein vorgenants Vlreichs pharrer von Czwentendorf Insigel, vnd mit vnsers vettern Insigel, hern Vlreichs des Pharrer von sant Stephan auf dem Wagram. Daz ist geschehen - Dreutzehen hundert Jar darnach in||
dem fumf vnd Dreyzzigistem Jar des phincztags nach dem ebenweich tag.

Source Fulltext: ZEIBIG, Klosterneuburg (=FRA II/10, Wien 1857) S. 252-253