Ich Olhayt des Hertworts Hausvrowe vergich - daz ich - mit meins wirts herwort gunst vnd willen vnd mit meins Perchmaisters hant hern Wysents von egenburch, vnd mit meins Perchmaisters vnd Amptmans hant Chunrats des Czistels verchauft han - zway weingarten, der ainer leit in der Chollengru^eb vnd ist ain halbes Jeuch, leit ze naechst Chunratem dem paeuerlein dem Choche, so leit der ander an dem Puechperig vnd ist ain Jeuch, leit ze naechst Nyclon des selden aydem, vnd daz haus, daz gelegen ist in der Stat ze naechst des Reczer haus vnd dev egenanten zwen weingarten, vnd daz haus, dev solt ich gehabt haben ze Leypgedinge vncz an mein tod, dev hab ich verchauft vnd geben meinen aydem, Jacoben der Schreiberinn sun vnd seiner hausvrowen meiner tochter vrown Katrein - also beschaydenleich, daz sev mir vncz an meinen tod von dem Jeuch weinwachs an dem Puechperig vnd von dem haus, daz do leit in der Stat, dienen sullen alle iar ze drin tage Sechs phunt phenning geltes Purchrechtes - Des gib ich disen prief - versigelten mit dez weingarten an dem Puechperig Perchmaisters vnd mit dez hauzz Amptmans Insigel Chunrat des Czistels vnd mit hern Ortolfs des Sluzzler Insigel - Der brief ist geben - Dreuczehen hundert iar darnach in dem vier vnd vierczigistem Jar an sand Georigen tag.

Source Fulltext: ZEIBIG, Klosterneuburg (=FRA II/10, Wien 1857) S. 301