Ich Ortolf mit der Petziechen, purger ze Wienne, vnd Ich dymuet, sein hausvrowe, vnd ich Wolfhart der Slu^ezzler, Ortolfs aydem vnd ich Anna sein hausvrowe wir veriehen - Daz wir - verchauft haben vnsers rechten chauf aigens Sechczich Emmer weins geltes Perchrechtes vnd ein halbes phunt wienner phenning geltes, daz dar zu^e ghO^eret, vnd daz allez gelegen ist auf zwainczich Jeuch weingarten ze Newnburch Chlosterhalben, Dez ersten in der weydnich an dem wehinger vnd an der ziegelgrueb vier Jeuch, vnd an dem weinhaus drithalb Jeuch, vnd an der Ern vierdhalb Jeuch vnd zway achtail, vnd in dem Hentleinsgraben vierdhalb Jeuch, vnd an dem Geswent vnd an dem Satelsteyge drev Jeuch vnd drev achtail, vnd auf dem hymel vnd an dem obern Aychwege drithalb Jeuch vnd drev achtail - vmb hundert phunt wienner phenning vnd vmb zwainczich phunt - Dem erbern manne Andren dem Vreysinger vnd seinen erben - Darvmb so geben wir disen prief - versigelt mit vnsern Insigeln, vnd mit des erbern manns Insigel Gundoldes des Tuczen - Der prief ist gegeben - Drevzehen hundert iar dar nach in dem Syben vnd vierczigisten Jar an sant Gorigen tag.

Source Fulltext: ZEIBIG, Klosterneuburg (=FRA II/10, Wien 1857) S. 318-319