Wir Albrecht Von Gotes Gnaden Herzog zu O^esterreich, ze Steyr, Vnd ze Kernden Tun chunt mit disem brief Vmb den Wechsel, den die erbern vnd geistleichen Leut der Probst vnd der Conventt ze Newmburch Chlosterhalben an ainem tail, Vnd Andre vnd Chunrat de Houser an dem andern tail mit einander getan haben Von des Gutes Wegen, daz die vorgenanten der Probst vnd der Convent habent ze Poyzbrun, Vnd von des gutes wegen so die egenanten houser habent ze Steten, daz derselb Wechsel mit Vnsern gu^eten Willen, vnd nach vnsern rat geschehen ist also, daz derselb Probst vnd der Convent die Vier phunt geltes miner Sechzig phenning Wienner ze Steten, di der Vorgenanten houser gewesen sind, vnd di si von dem Schenken von Ryed gechouft habent, ledichlich vnd Vreylich innehaben vnd niezzen sullen, als die diselben houser vnd der Schenk von Ryed habent inne gehabt, Vnd sol der Purgraf Vom Greitschenstain, wer der ist, mit steu^eren, mit fuerat, noch mit andern beschwerung mit demselben gut nichtes nicht haben ze schaffen. So sullen di obgenanten houser, vnd ir erben daz gut ze Poyzprun, daz dez Probst vnd des Convents gewesen ist, Vnd daz von der Chappellen ze Newnburch Chlosterhalb herchomen ist, ouch innehaben vnd niezzen ledichlich vnd Vreylich, alz ez derselb Probst vnd der Convent habent innegehabt, Des geben wir ze Vrchund disen brief besigelten mit Vnserm Insigel, der geben ist ze Wienn an Vreytag nach dem Auffarttag, do man zalt von Christes geburd dreuzehen hundert Jar, darnach in dem Siben vnd Vierzkigstem Jar. Wokchinger.

Source Fulltext: ZEIBIG, Klosterneuburg (=FRA II/10, Wien 1857) S. 319-320