Ich Margret vnd ich Pericht, hern Gotfrits Swestern weilen Chapplan der Chappellen sand Phylippen in der Newburger hof vor Schotten Tor ze Wienne dem got genade - wir veriehen - vmb den chrieg vnd ansprach, die wir gehabt haben auf den weingarten, der da leit auf dem Nuzpach vnd haizzet der Mu^eczhan, des drev viertail sint ze naechst Petreins weingarten des Swaebleins, den der vorgenant vnser Prueder her Gotfrit geschaft hat der egenanten Chappellen sand Phylippen. Daz wir denselben Chrieg und ansprach mit gutem willen vnverschaydenleich ze Schidung lazzen an dem Erbern Herren, hern Hainreichen von Swandekke, zu den zeiten Hofmarschalich dez edeln hochgeborn fursten herczog Albrechten ze O^esterreich, ze Steyr vnd ze Chernden vnd an den Erbern Ritter hern haugen den floyt. Die habent beschayden vnd gesprochen, Daz vns der Erber Geistleich herre Brobst Rudwein des Goteshauses vnser vrowen ze Newnburch fur alle die Chrieg vnd ansprach, die wir auf den egenanten weingarten gehabt haben, gegeben hat Sechs phunt wienner phenning - Vnd haben auch wir - mit der Perchvrowen vnd Perchherren handen, Der Erbern Gaeistleichen vrown, Swester Maechthilden‚ zu den zeiten Abtessinne dacz sand Chlarn ze Wienne vnd dez Erbern herren hern Vlreichs des Chirichenchnophs , zu den zeiten Chapplan der Chappellen vnser vrown vnd sand Johanns in der Purch ze Wienne, vnd hern Nychlas zu den zeiten Chapplan der Chappellen ze Chranperch dez obgenanten weingarten, der da leit auf dem Nuzpach, da man alle iar von dient den Gaeistleichen vrown dacz sant Chlaren ze Wienne vierdhalben wienner phenning ze Perchrecht, vnd der||
egenanten Chappellen in der Purch ze Wienne auch vierdhalben wienner phenning ze Perchrecht, vnd der Chappellen ze Chranperch ainen Emmer weins ze Perchrecht vnd ainen phenning ze voytrecht, vnd der Erbern vrowen vron Chunigunden hern Otten wittibe von Nuzdorf, dem got genade, fumfzehen wienner phenning ze vberzins - vns gar vnd genczlich verzigen vnd furczicht getan - Vnd wand wir selber nicht aigener Insigiln haben‚ darvmb so geben wir In disen brief - versigelten mit der vorgenanten Purchvrowen vnd Purchherren Insigiln - vnd mit der vorgenanten vnser zwayr schidmanne Insigiln. - Diser prief ist geben - Dreuczehen hundert Jar darnach in dem Syben vnd vierczigisten Jar an sand Andres abent.

Source Fulltext: ZEIBIG, Klosterneuburg (=FRA II/10, Wien 1857) S. 320-321