Ich Jacob, des alten Slu^ezler Sun, ze den zeiten Stat Richter, Wir der Rat gemain der Stat ze Neunburch Chlosterhalben Verichen - Daz wir - Verchauft vnd geben haben mit rechter fu^erzicht Von Vnsern Spital in dem Lederpache dem Lachstampf halben gelegen in Trautweins haus an dem Lederpach vnd desselben Wezers fluz Vall vnd gevelle auf dem selben Stampf halbes vmb Syben phunts Wi\enner phenning der wir gar vnd ganz verricht vnd gewert sein, Vnd damit vnser Spital geweicht ist, Vnser Vrown Gotzhaus hie ze Neunburch ze nuz vnd frum seiner Mu^el pei der Phisterprucke fu^erbaz Vreileich vnd Ledichleich ze haben - also, daz fu^erbaz von Vnsers Spitals wegen, noch von nymant ander dhain Stampf, noch Vall, noch flug, vnd dhain irrung an dein Wazzer nimmehr mer werden, noch geschechen sol zwischen des egenanten Gotshaus Mu^el, vnd Wysents Mu^el an dem anger an dem Griezprun Vnd desselben Wazzer fluz, Vall vnd gevelle halbs sein wir vnd vnser Spital des obgenanten Gotshaus recht gewern - Des geben wir - disen brief - versigelten mit vnser Stat insigel. Der brief ist geben - Dreyzehenhundert Jar, darnach in dem dreu vnd funfzigisten Jar ze Mitter Vasten.

Source Fulltext: ZEIBIG, Klosterneuburg (=FRA II/10, Wien 1857) S. 342-343