Ich Vlreich der Vaelebrunner vnd Ich Anna, sein hausvrow vnd Ich Albrecht der Vaelebrunner, Vlreichs Pru^eder vnd vnser erben, Wir veriehen - Daz der erwirdige herre‚ her Ortolf, der Volchenstorfer, ze den zeiten Brobst ze Newnburch vns vnd vnsern erben gelihen vnd lazzen hat von seinen gnaden Acht vnd zwainczig Jeuchart achkers‚ di da ligent auf der hayd zwischen fyendorf vnd Vaelebrunne da von vnser vordern Emoln dem Gotshaus vnser vrowen ze Newnburch gedient habent alle iar an sand Cholmans tag Syben Schilling vnd zwainczig phenning, allez wienner phenning, vnd sint auch diselben A\echker dem Gotshaus vnser vrowen ze Newnburch emoln von vns vervallen gewesen vmb den versezzen dienst - daruber so geben wir dem Erwirdigen herren, Brobst Ortolfen dem Volkenstorfer vnd dem Convent gemain - disen prief - versigelten mit mein, Vlreichs insigel des Vaeleprunner, vnd mit mein Albrechtes Insigel des Vaelebrunner vnd ist auch der prief gegeben - dreuczehen hundert iar‚ darnach in dem acht vnd fumfczigistem iar an sand Johannes abent ze Sunniventen.

Source Fulltext: ZEIBIG, Klosterneuburg (=FRA II/10, Wien 1857) S. 385-386