Ich Pilgreim der Stra\evn von Ulreichschirichen vnd Ich Marigret sein Hausvrowe vnd alle vnser erben, wir veriehen - Daz wir - verchauft haben vnsers rechten aygens, daz wir in recht aygens gewer vnd vnversprochenleichen herpracht haben, vnd daz wir mit furtzicht von allen vnsern erben getailt haben Achczk Jeuchart akchers vnd zwo wis, der do sint dreuzehen tagwerich, vnd ist gelegen dacz Sweinsteig in drin velden, vnd ain wis, haizzt die Langwis vnd die ander haizzt di Wispennch, vnd hat gehort in den mairhof dacz Sweinsteig vnd alles daz dar in gehO^ert an die hofmarich alain, di hab wir auzgenomen, waz aver dez andern ist, daz darin gehO^ert - daz hab wir alles verchauft den Erbern leuten, vnsern holden dacz Sweinsteig, Nyclasen, dem amman vnd Elspeten, seiner hausvrown, vnd seinem Pru^eder Mertten vnd Margreten, seiner hausvrowen, vnd Chunraten, dem RO^eten vnd Katrein, seiner hausvrowen, vnd Perchtolten dem hakcher vnd Perichten, seiner hausvrowen, vnd Andren, dem Snokken vnd Katrein, seiner hausvrowen, vnd Nyclasen, dem Nuechten vnd Dyemuten, seiner hausvrowen, vnd Chunrat Gerharten vnd Margreten, seiner hausvrowen, vnd Vlreichen, dem Vnger vnd seiner hausvrowen, vnd Symon, dem Stainwant vnd Margreten, seiner hausvrowen, vnd Jansen, des Phaffen aydem, vnd Margreten, seiner hausvrawen vnd Andren dem Wirtlein vnd Elspeten seiner hausvrawen vmb zwai hundert phunt vnd vmb viertzk phunt phenning wienner mu^enzz - Wir veriehen auch - daz wir die egenanten aygenschaft auf dem egenanten gu^et nach rat vnd mit irm guetleichen willen, der egenanten leut vnser holden, di daz gut von vns gechauft habent vnd auch schon vergolten habent, gemacht vnd gegeben haben in die chirichen dacz Sweinsteig auf sand Peters alter, Also daz si da pey ewichleich beleiben schol, vnd nimer mer her dan chO^emen schol. Iz wellent auch die vorgenannten leut, vnser holden daz vorgenante gu^et - durch got vnd durch irr sel hail willen gu^etleich vnd gern haben vnd emphahen ze rechtem Purchrecht - von dem erbern herren hern Micheln ze den zeiten Pharrer dacz Sweinsteig, oder wer do pharrer ist, vnd wellent auch fu^erbaz do von||
dienn von einer Jeuchart akchers ainn wienner helblinch, vnd ie von ainem tagwerich wismad ainn wienner phenning an sand Cholmans tag vnd nicht mer, vnd schol auch fu^erbaz der dienst nicht gehO^echt, noch gemert werden - vnd wan man des gutes icht verchauft, so wirt von ieder Jeuchart ze ablait ain wienner helblinch vnd ze anlait ain helblinch, vnd von iedem tagwerich wismad ainn wienner phenning ze ablait, vnd ain phenning ze anlait, vnd nicht mer. Wer aber daz, daz der egenanten Leut ainer oder mer des gu^etes icht inne hiet seines dienstes zu dem rechten tag nicht engeb, daz er vngern tuen scholt, er hab sein vil oder wenik, der ist nicht mer vervallen inner iars frist, denn zwelif wienner phening ze wandel vnd den dienst. - Vnd geben in daruber den gegenwürtigen prief - versigelt mit meines vorgenanten Pilgreims des Stra\evn anhangunden Insigel vnd mit der erbern herren Insigel, hern Eberharts des Dachsperger vnd hern Chadolts des haslawer von dem hv\ernsperg - Der prief ist gegeben - Dreutzehen hundert Jar, dar nach in dem Acht vnd fumfczigisten iar an sant Phylipss tag.

Source Fulltext: ZEIBIG, Klosterneuburg (=FRA II/10, Wien 1857) S. 384-385