Ich Katrey, Rugers Tochter von Nydern Chriczendorf, Ernsten des Gruen witib von Ladendorf, dem got genade, vnd Ich Peters, ir Swester vnd Ich Symon Ir svn, vnd alle vnser erben wir veriehen - Daz wir - verchauft haben vnsers rechten vreyn aygen vaeterleichen erbes ain vnd zwainczich wienner phenning gelts, die gelegen sint zu Nydern Chriczendorf auf behaustem gu^et auf drein hofsteten, da zu der zeit auf gesezzen ist Hainreich auf einer hofstat, vnd Vreydanch auf ainer hofstat vnd Chunrat auf einer hofstat - vnd ein halben emmer perchrecht, der auch gelegen ist daselb zu Chriczendorf auf einen viertail weingarten zu naechst dem Echerlein, daz ze der zeit der Chodlin gewesen ist, vnd den man alle iar davon dient recht als ander Perchrechts recht ist - Dem Erwirdigen herren Brobst Ortolfen dez Chlosters zu Newnburch - vmb vier phunt wienner phenning - so geben wir in - disen prief versigelten, wann wir alle nicht aigen insigel haben - vnder des erbern herren hern Oswalts von Ladendorf anhangunden Insigel - vnd mit mein vorgenanten Katrein des Gruen witib steuf svn, Lyebharts, des gruen anhangunden Insigel vnd mit Jacobs, ze der zeit Richter ze Newnburch anhangunden Insigel - Der prief ist geben - Dreutzehen hundert Jar vnd dar nach in dem Sechczigisten Jar an Sand Philipps vnd sand Jacobs tag, der heiligen zwelif poten.

Source Fulltext: ZEIBIG, Klosterneuburg (=FRA II/10, Wien 1857) S. 396-397