Ich Seifrid der Mair ze Enczestorf vnd ich Wentel, sein Hausvraw Vnd vnser paider eriben Wir vergechen - daz wir - mit vnsers rechten Gruntherren hant, Herrn Pilgreims des Wu^erffel, zden zeiten Chorherre vnd Obrister Chellner vnser Vrawn Goteshaus ze Neunburch verchauft haben ain phunt Wienner phenninge geltes purchrechtes auf vnsern haus vnd seczt hinder dor on, vnd waz mit recht darczu gehoret - Vmb Newn phunt Wienner phenninge - hincz sand Agnesen Chappelln ze Neunburch in dem chreuzgange Also beschaidenleichen, daz wir oder swer daz vorgenant haus nach vns inne hat, Daz egenant phunt geltes zu der egenanten Chappelln - iarleichen dienne schulln zu den zwain zeiten im iar, ain halb phunt an Sand Georigentage, vnd ain halb phunt an Sand Merteinstage mit alln den nuczen vnd rechten, alz man ander purchrecht dient in Osterrich - Vnd wan wir nicht aigen Insigil haben, So geben wir daruber der egenannten Chappelln vnd irn Verwesern vnd Chappelan disen brief versigilten mit vnsers egenanten Grunt Herren Insigil, Pilgreim des Wu^erffel - Vnd darczu hab wir gepeten den Erbern man Michelln an dem Newsidel, daz er diser sache auch geczeug sei mit seinen Insigil. Der briff ist geben - Drewczehen Hundert Jar vnd in dem Sechczgisten iar an sand Niclos Tage.

Source Fulltext: ZEIBIG, Klosterneuburg (=FRA II/10, Wien 1857) S. 397